முதல்வராக விஜய் பதவியேற்பு: தவெகவினா் கொண்டாட்டம்

தவெக தலைவா் விஜய் தமிழக முதல்வராக பொறுப்பேற்றதை அடுத்து அக்கட்சியினா் செங்கல்பட்டு பேருந்து நிலையம் அருகில் பட்டாசு வெடித்து இனிப்பு வழங்கி கொண்டாடினா்.

புதிய பேருந்து நிலையத்தில் இருந்து ஊா்வலமாக ஜிஎஸ்டி சாலை, மணி கூண்டு, புதிய பேருந்து நிலையம் மேலும் தண்டுக்கரை அருகில் உள்ள எம்ஜிஆா் சிலைக்கு மாலை அணிவித்தனா். மேலும், தவெக தலைவா் முதல்வராக பதவி ஏற்றதையொட்டி செங்கல்பட்டு நகர கழகம் சாா்பாக அனைத்து நிா்வாகிகளும் பட்டாசு வெடித்து பொதுமக்களுக்கு இனிப்பு வழங்கி கொண்டாடினா். தமிழக வெற்றிக்காக கட்சியின் செங்கல்பட்டு நகர செயலாளா் பூக்கடை ஜின்காா்த்திக் தலைமையில் ஏராளமான கட்சியினா் இனிப்புகள் வழங்கி மகிழ்ச்சியை வெளிப்படுத்தினா்.

திருவள்ளூரில்... தமிழக முதல்வராக ஞாயிற்றுக்கிழமை தவெக தலைவா் விஜய் நேரு உள்விளையாட்டு அரங்கில் நடைபெற்ற நிகழ்வில் பதவியேற்றுக் கொண்டாா். இந்த நிலையில், திருவள்ளூா் மாவட்டம், எல்லாபுரம் ஒன்றியம்,பெரியபாளையத்தில் உள்ள பிரசித்தி பெற்ற அருள்மிகு பவானி அம்மன் திருக்கோயிலில் முதல்வராக ஜோசப் விஜய் பதவியேற்க வேண்டும் தவெகவினா் அக்னிசட்டி எடுப்பதாக வேண்டிக்கொண்டனா்.

இதை நிறைவேற்றும் வகையில் அக்னி சட்டி எடுக்கும் நிகழ்ச்சி ஞாயிற்றுக்கிழமை நடைபெற்றது. இந்த நிகழ்வில் எல்லாபுரம் கிழக்கு ஒன்றிய செயலாளா் விமல்குமாா் தலைமை வகித்தாா். இதில் நிா்வாகி சி.கோபாலகிருஷ்ணன் முன்னிலை வகித்தாா். இதில் அந்தக் கட்சியினா் சுமாா் 20 போ் தீச்சட்டி ஏந்தியும், வேப்பஞ்சேலை அணிந்தும் நோ்த்திக் கடனை நிறைவேற்றினா். இதற்கான ஏற்பாடுகளை ஒன்றிய மகளிா் அணி நிா்வாகி அஞ்சலி சந்துரு உள்ளிட்டோா் செய்திருந்தனா்.

மதுராந்தகத்தில்... மதுராந்தகம் நகர தவெக சாா்பில் பேருந்து நிலைய வளாகம் அருகில் மதுராந்தகம் நகர தலைவா் இ.பெருமாள் தலைமையில் பட்டாசு வெடித்து பொதுமக்களுக்கு இனிப்புகளை வழங்கினா். இந்நிகழ்வில் நகர செயலாளா் ராஜேஷ், துணைச் செயலா் காா்த்திக், பொருளாளா் லோகு உள்பட 20க்கும் மேற்பட்டோா் கலந்து கொண்டனா்.