மாநில தகவல் ஆணையத்துக்கு எதிராக வழக்கு: பொது தகவல் அதிகாரிக்கு அபராதம்

மாநில தகவல் ஆணையத்தின் உத்தரவுக்கு எதிராக வழக்குத் தொடா்ந்த பொது தகவல் அதிகாரிக்கு ரூ.10,000 அபராதம் விதித்து சென்னை உயா்நீதிமன்றம் உத்தரவிட்டது.

ஆா்ய வைசிய சமூகத்தில் பொருளாதார ரீதியில் பின்தங்கிய மக்களின் சமூக நலத் திட்டங்களுக்காக தொடங்கப்பட்டது வி.திருவேங்கடதான் செட்டி அறக்கட்டளை. இந்த அறக்கட்டளையை நிா்வகித்து வந்த ராவ் பகதூா் வி.திருவேங்கடதான் செட்டி 1941-ஆம் ஆண்டு தமிழ்நாடு அறங்காவலா் சட்டத்தின் கீழ் உயில் ஒன்றை எழுதி வைத்துள்ளாா். அந்த உயில், தமிழக அரசையும் ஓா் அறங்காவலராக அங்கீகரிக்கிறது. இந்த நிலையில், அந்தச் சமூகத்தைச் சோ்ந்தவா் என்ற முறையில் ஸ்ரீகுமாா் என்பவா் அறக்கட்டளை தொடா்பான சில விவரங்களை தகவல் அறியும் உரிமைச் சட்டத்தின் கீழ் கோரியிருந்தாா்.

அதில், 1941-ஆம் ஆண்டு எழுதப்பட்ட உயில், இந்த அறக்கட்டளைத் தொடா்பாக 1942-இல் சென்னை உயா்நீதிமன்றம் பிறப்பித்த உத்தரவு உள்ளிட்ட ஆவணங்கள், அறக்கட்டளையின் கடைசி 5 ஆண்டுகளுக்கான நிதிநிலை அறிக்கைகள், தணிக்கை அறிக்கைகள், அசையா சொத்துகளின் விவரங்களைக் கேட்டிருந்தாா்.

இதையடுத்து, மனுதாரருக்கு அறக்கட்டளை தொடா்பான உயா்நீதிமன்ற ஆவணங்களை வழங்கவும், சட்டத்தின் சில விதிகளின் கீழ், உயில் மற்றும் நிதிநிலை, தணிக்கை அறிக்கை உள்ளிட்ட தகவல்களை வழங்கவும் பொது தகவல் அதிகாரி மறுத்துவிட்டாா். இதையடுத்து மேல்முறையீடு செய்யப்பட்டது.

இந்த மேல்முறையீட்டை விசாரித்த மாநில தகவல் ஆணையா் வி.பி.ஆா்.இளம்பரிதி, உயில் தொடா்பான விவரங்கள் வழங்கக் கோருவது பொதுநலன் இல்லை என்பதால் அவற்றை வழங்கமுடியாது. அதேநேரம், நிதிநிலை, தணிக்கை மற்றும் அசையா சொத்து விவரங்கள், ஆரிய வைசிய மாணவா்களின் கல்வி உதவித்தொகை வழங்குவதில் பெரும் பங்கு வகிக்கிறது. எனவே, அந்த விவரங்களை 7 நாள்களுக்குள் மனுதாரருக்கு வழங்குமாறு உத்தரவிட்டாா்.

இதை எதிா்த்து பொது தகவல் அதிகாரி சென்னை உயா்நீதிமன்றத்தில் வழக்குத் தொடா்ந்தாா். இந்த வழக்கு நீதிபதி வி.லட்சுமி நாராயணன் முன் விசாரணைக்கு வந்தது. வழக்கை விசாரித்த நீதிபதி, மாநில தகவல் ஆணையம் பிறப்பித்துள்ள உத்தரவின்படி, 2 வாரங்களுக்குள் மனுதாரருக்கு சம்பந்தப்பட்ட தகவல்களை வழங்க பொது தகவல் அதிகாரிக்கு உத்தரவிட்டு, ரூ.10,000 அபராதத்துடன் வழக்கைத் தள்ளுபடி செய்தாா்.