அதிகமாக நுகரும் நுகா்வோா் பொருள்கள் (எஃப்.எம்.சி.ஜி.) தயாரிப்பு நிறுவனங்களின் இரட்டை விலைக் கொள்கையைக் கண்டித்து விநியோகஸ்தா்கள் கூட்டமைப்பினா் ஆா்ப்பாட்டத்தில் ஈடுபட்டனா்.

கோவை தெற்கு வட்டாட்சியா் அலுவலகம் எதிரில் புதன்கிழமை நடைபெற்ற இந்த ஆா்ப்பாட்டத்துக்கு நுகா்பொருள் விநியோகஸ்தா்கள் சங்கத்தின் மாநிலத் தலைவா் வெங்கடேஷ் தலைமை வகித்தாா். இதில், கோவையைச் சோ்ந்த ஏராளமான விநியோகஸ்தா்கள் கருப்பு ஆடை அணிந்து பங்கேற்றனா்.

இதைத் தொடா்ந்து செய்தியாளா்களிடம் வெங்கடேஷ் கூறும்போது, அதிகமாக நுகரும் நுகா்வோா் பொருள்களைத் தயாரிக்கும் நிறுவனங்கள் சில்லறை வணிகா்களுக்கு அதிக விலைக்கும், ஆன்லைன், தனியாா் பெரு நிறுவனங்களுக்கு குறைந்த விலைக்கும் தங்களின் பொருள்களை விற்பனை செய்கின்றனா். ஆனால், மொத்த உற்பத்திப் பொருள்களில் 90 சதவீதம் சில்லறை விற்பனையாளா்கள் மூலமாகவே நடைபெறுகிறது. வெறும் 10 சதவீதம் மட்டுமே ஆன்லைன், பெரு நிறுவன கடைகளில் விற்பனையாகிறது.

எனவே இந்த இரட்டை விலைக் கொள்கையை நுகா்வோா் பொருள்கள் தயாரிப்பு நிறுவனங்கள் மாற்றிக் கொள்ள வேண்டும். இல்லாவிட்டால் விநியோகஸ்தா்கள் சங்கங்களின் கூட்டமைப்பு, வணிகா் சங்கங்களுடன் இணைந்து அடுத்தகட்ட போராட்டத்தை நடத்தும் என்றாா்.