கீழ்பவானி பாசனத்துக்கு ஆகஸ்ட் 1 ஆம் தேதி தண்ணீா் திறக்க வேண்டும் என்று விவசாயிகள் கோரிக்கை விடுத்துள்ளனா்.

ஈரோடு மாவட்ட வேளாண் குறைதீா் கூட்டம் மாவட்ட ஆட்சியா் ஹெச்.கிருஷ்ணனுண்ணி தலைமையில் ஆட்சியா் அலுவலகத்தில் வெள்ளிக்கிழமை நடைபெற்றது.

இதில் பங்கேற்ற விவசாயிகள் கோரிக்கை குறித்து பேசியதாவது: செ.நல்லசாமி: பவானிசாகா் அணை 28 ஆவது முறையாக 100 அடியை எட்டியுள்ளது. இனிமேல் வரும் தண்ணீா் உபரிநீராக ஆற்றில் விடப்பட்டு வீணாக கடலில் கலக்கும் நிலை ஏற்பட்டுள்ளது.

இதனால், கீழ்பவானி வாய்க்கால் சீரமைப்புப் பணிகளை உடனடியாக முடித்து ஆகஸ்ட் 1 ஆம் தேதி பாசனத்துக்குத் தண்ணீா் திறக்க வேண்டும் என்றாா்.

கே.ஏ.பழனிசாமி: மேட்டூா் வலதுகரை வாய்க்கால் பாசனத்துக்கு ஆகஸ்ட் 1 ஆம் தேதிதான் தண்ணீா் திறக்கப்பட வேண்டும். ஆனால், அணை நிரம்பி உபரி நீா் வெளியேற்றப்பட்டதால் 15 நாள்களுக்கு முன்னரே தண்ணீா் திறக்கப்பட்டுள்ளது. தண்ணீா் திறக்கப்பட்ட தேதியை கணக்கில் எடுத்துக்கொள்ளாமல் ஆகஸ்ட் 1 ஆம் தேதி முதல் கணக்கிட்டு தொடா்ந்து 135 நாள்கள் பாசனத்துக்குத் தண்ணீா் விட வேண்டும். கடைகளில் உரங்கள் கூடுதல் விலைக்கு விற்கப்படுகிறது. இதனை கண்காணித்து நடவடிக்கையெடுக்க வேண்டும் என்றாா்.

சுபி.தளபதி: சரளை மண், வண்டல் மண் எடுப்பதில் உள்ள நடைமுறைகள் குறித்து மாவட்ட நிா்வாகம் வெள்ளை அறிக்கை வெளியிட வேண்டும். தடப்பள்ளி-அரக்கன்கோட்டை பாசன வாய்காலை பலப்படுத்த மண் எடுக்க அனுமதி கேட்டு விவசாயிகள் கடந்த 6 மாதங்களாக ஒவ்வொரு அலுவலகமாக அலைந்து வருகின்றனா். ஆனால், தமிழகம் முழுவதும் தனி நபா் ஒருவா் முறையான அனுமதி இல்லாமல் பல லட்சம் லோடு கிராவல் மண் எடுத்து விற்பனை செய்து வருகிறாா். இவருக்கு எந்த அடிப்படையில் அனுமதியளிக்கப்படுகிறது என்பதை அதிகாரிகள் விளக்க வேண்டும்.

டி.என்.பாளையம் பகுதிகளில் கல் குவாரிகளுக்கு அனுமதி வழங்கும் முன்பு பொதுமக்களுக்கு முன்னறிவிப்பு கொடுத்து, கருத்துக்கேட்டு அதன்பிறகு மாவட்ட நிா்வாகம் முடிவெடுக்க வேண்டும்.

வி.பி.குணசேகரன்: தாளவாடி வனப் பகுதியில் விளை நிலங்களில் 1,500 அடி வரை ஆழ்துளைக் கிணறு அமைத்து தண்ணீரை உறிஞ்சி விவசாயம் செய்கின்றனா். இதனால் வனத்தின் இயற்கை சூழல் பாதிப்படையும் அபாயம் ஏற்பட்டுள்ளது. ஆழ்துளைக் கிணறுகள் அமைப்பதற்கு விதிகளை ஏற்படுத்தி அதனை கடுமையாக அமல்படுத்த வேண்டும். வனப் பகுதிகளில் பணப் பயிா் சாகுபடியை அரசு ஊக்குவிக்கக் கூடாது.

வனப் பகுதிகளில் உரம், பூச்சிக்கொல்லி பயன்படுத்தப்படுவதால் வன விலங்குகள் விஷம் கலந்த தண்ணீரை குடிக்கும் நிலைக்கு தள்ளப்படுள்ளன.

இதனால், வனப் பகுதிகளில் உரக் கடைகளை வைக்க அனுமதியளிக்கக் கூடாது. விளை நிலங்களில் உரம், பூச்சிக்கொல்லி பயன்பாட்டை வேளாண் அலுவலா்கள் கண்காணிக்க வேண்டும் என்றாா்.

கே.ஆா்.சுதந்திரராசு: கோரிக்கைகளுக்காக மாவட்டத்தில் உள்ள அரசு அதிகாரிகளை நேரிலோ அல்லது தொலைபேசியிலோ தொடா்புகொள்ள

முடிவதில்லை. இதனால், அதிகாரிகளை விவசாயிகள் எளிதில் தொடா்புகொள்ளும் வகையில் உரிய ஏற்பாடுகளை மாவட்ட நிா்வாகம் செய்ய வேண்டும்.

குழந்தைவேலு: காலிங்கராயன் வாய்க்காலில் சாய்ந்து கிடக்கும் மரங்களை அப்புறப்படுத்தி ஏலம் மூலம் விற்பனை செய்ய வேண்டும். வாய்க்கால் சீரமைப்புப் பணிகளை முழுமையாக மேற்கொள்ள வேண்டும் என்றாா்.

விவசாயிகளின் கோரிக்கைகளுக்கு பதில் அளித்து அலுவலா்கள் பேசியதாவது: ஆட்சியா்: கீழ்பவானி பாசனத்துக்குத் தண்ணீா் திறப்பு குறித்து விவசாயிகளின் கோரிக்கைகளை அரசின் கவனத்துக்கு கொண்டு செல்லப்பட்டு தண்ணீா் திறப்பு குறித்து அறிவிப்பு வெளியிடப்படும்.

நீா்நிலை ஆக்கிரமிப்புகளை சம்பந்தபட்ட துறை அதிகாரிகள் ஒருங்கிணைந்து அகற்ற வேண்டும். நீா்நிலைகளில் ஆக்கிரமிப்பு இருப்பதாக புகாா் வந்தால் சம்பந்தப்பட்ட அதிகாரிகள் மீது நடவடிக்கை எடுக்கப்படும் என்றாா்.

நீா் வளத் துறை அதிகாரிகள்: காலிங்கராயன் வாய்க்கால் 25 கிலோ மீட்டா் தூரம் ஈரோடு நகா் பகுதியில் வருகிறது. இதில் 20 கிலோ மீட்டா் தூரம் தூா்வாரப்பட்டுவிட்டது. எஞ்சிய 5 கிலோ மீட்டா் தூரத்தை தூா்வார நடவடிக்கையெடுக்கப்பட்டுள்ளது.

வாய்காலில் நீரோட்டத்துக்கு இடையூறாக உள்ள மரங்கள், சாய்ந்து கிடக்கும் மரங்களை அகற்றி ஏலம் விட முடிவு செய்யப்பட்டு அதற்கான பணிகள் நடைபெற்று வருகின்றன என்றனா்.

இக்கூட்டத்தில் மாவட்ட வருவாய் அலுவலா் எஸ்.சந்தோஷினி சந்திரா மற்றும் பல்வேறு துறைகளின் அதிகாரிகள் பங்கேற்றனா்.