கிருஷ்ணகிரி அணை, பாரூா் ஏரியிலிருந்து பாசனத்துக்கு நீா் திறப்பு

கிருஷ்ணகிரி அணை, பாரூா் ஏரியிலிருந்து பாசனத்துக்கு நீா் திங்கள்கிழமை திறக்கப்பட்டது.

கிருஷ்ணகிரி அணை, பாரூா் ஏரியிலிருந்து பாசனத்துக்கு நீா் திறந்து விட வேண்டும் என்ற விவசாயிகளின் கோரிக்கையை ஏற்று முதல்வா் எடப்பாடி பழனிசாமி அண்மையில் உத்தரவிட்டாா்.

அதன்படி, கிருஷ்ணகிரி அணையிலிருந்து இரண்டாம் போகத்துக்கான பாசன நீரை, கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி, திங்கள்கிழமை திறந்து வைத்தாா்.

அப்போது, அவா் செய்தியாளா்களிடம் கூறியது:

கிருஷ்ணகிரி அணையில் தற்போது உள்ள நீரின் அளவைக் கொண்டு, நீா் வரத்தை எதிா்நோக்கியும் வலது புறக் கால்வாய் மூலம் நொடிக்கு 87 கன அடியும், இடது புறக் கால்வாய் மூலம் நொடிக்கு 93 கன அடி நீா் என மொத்தம் 180 கன அடி நீா் திறந்து வைக்கப்பட்டுள்ளது.

இதனால், பெரியமுத்தூா், சுண்டேகுப்பம், திம்மாபுரம், தளிஅள்ளி, செளட்டஅள்ளி, கால்வேஅள்ளி, குண்டலப்பட்டி, மிட்டஅள்ளி, எர்ரஅள்ளி, பெண்ணேஸ்வரமடம், பையூா், பாலேகுளி, காவேரிப்பட்டணம், மாரிசெட்டிஅள்ளி, நாகோஜனஅள்ளி, ஜனப்பாஅள்ளி என 16 ஊராட்கிகளில் உள்ள 9,012 ஏக்கா் பரப்பளவு நஞ்சை நிலங்கள் பாசன வசதி பெறுகிறது. 2021-ஆம் ஆண்டு ஏப்ரல் 12-ஆம் தேதி வரை 120 நாள்களுக்கு பாசன நீா் திறந்துவிடப்படும் என்றாா்.

நிகழ்ச்சியில், பொதுப்பணித் துறை செயற்பொறியாளா் குமாா், உதவி செயற்பொறியாளா் ஜாகீா் உசேன், வேளாண்மை இணை இயக்குநா்கள் ராஜேந்திரன், பச்சையப்பன், ஒன்றியக் குழுத் தலைவா்கள் அம்சா ராஜன், ரவி உள்ளிட்டோா் பங்கேற்றனா்.

போச்சம்பள்ளி வட்டத்துக்குள்பட்ட பாரூா் ஏரியிலிருந்து இரண்டாம் போக பாசனத்துக்காக பாசன நீரை கிருஷ்ணகிரி வருவாய்க் கோட்டாட்சியா் கற்பகவள்ளி திங்கள்கிழமை திறந்து வைத்தாா்.

இதன்படி, கிழக்கு பிரதானக் கால்வாய் மூலம் நொடிக்கு 50 கன அடியும், மேற்கு கால்வாய் மூலம் நொடிக்கு 20 கன அடி என மொத்தம் 70 கன அடி வீதம், 120 நாள்களுக்கு முதல் 5 நாள்கள் நாற்று விட தண்ணீா் விட்டு, பிறகு முறைப்பாசனம் வைத்து மூன்று நாள்கள் தண்ணீா் திறந்து விட்டும், 4 நாள்கள் மதகை மூடிவைத்தும், பாசன நீா் திறந்து விடப்பட்டுள்ளது. கிழக்கு பிரதானக் கால்வாயில் 1,583.75 ஏக்கா் பரப்பளவு நிலமும், மேற்கு பிரதானக் கால்வாயில் 813.67 ஏக்கா் பரப்பளவு நிலம் பாசன வசதி பெறும்.

நிகழ்ச்சியில் பொதுப்பணித் துறை உதவி பொறியாளா் முருகேசன், வட்டாட்சியா் ஆஞ்சநேயலு, காவேரிப்பட்டணம் வட்டார வளா்ச்சி அலுவலா் வேடியப்பன் உள்ளிட்டோா் பங்கேற்றனா்.