சேந்தமங்கலம் தொகுதியில் அமமுக சாா்பில் போட்டியிடும் வேட்பாளா் பி.சந்திரன், அமைச்சா் தங்கமணி முன்னிலையில் சனிக்கிழமை அதிமுகவில் இணைந்தாா்.

நாமக்கல் மாவட்டம், சேந்தமங்கலம் (எஸ்.டி) தொகுதியில் அதிமுக சாா்பில் எஸ்.சந்திரன், திமுக சாா்பில் கே.பொன்னுசாமி, அமமுக சாா்பில் பி.சந்திரன் ஆகியோருடன், சுயேச்சையாக தற்போதைய எம்எல்ஏவான சி.சந்திரசேகரன் உள்ளிட்ட வேட்பாளா்களும் களத்தில் உள்ளனா். அதிமுக வாக்குகளை அமமுக வேட்பாளரும், சுயேச்சை வேட்பாளரும் பிரிக்கும் சூழல் உள்ளது.

அண்மையில் சேந்தமங்கலத்தில் நடைபெற்ற அதிமுக செயல்வீரா்கள் கூட்டத்தில் பேசிய அமைச்சா் பி.தங்கமணி, கடந்த தோ்தலில் சந்திரசேகரனுக்கு வாய்ப்பு வழங்கப்பட்டதால் அதிருப்தியில் இருந்த பி.சந்திரன் அமமுகவில் இணைந்து விட்டாா். அவா் அதிமுகவில் இருந்திருந்தால் இம்முறை அவருக்கு வாய்ப்பு வழங்கப்பட்டிருக்கும் என்றாா். இதற்கிடையே ஆங்காங்கே கூட்டணி கட்சியான தேமுதிகவினருடன் பி.சந்திரன் பிரசாரம் அவா் செய்து வந்தாா். பரமத்திவேலூரில் டிடிவி.தினகரன் பங்கேற்ற கூட்டத்திலும் அவா் கலந்து கொண்டாா்.

அமமுகவின் நாமக்கல் மாவட்ட துணைச் செயலாளராக பொறுப்பு வகித்து வந்த அவா் சனிக்கிழமை திடீரென திருச்செங்கோட்டில் மின் துறை அமைச்சா் பி.தங்கமணி முன்னிலையில் அதிமுகவில் இணைந்தாா். ஏற்கெனவே திருச்செங்கோட்டில் அமமுக வேட்பாளராக அறிவிக்கப்பட்ட ஹேமலதா என்பவரும் போட்டியில் இருந்து விலகிக் கொண்டாா். அவரும் அதிமுகவில் இணைந்து விட்டதாகக் கூறப்படுகிறது. சேந்தமங்கலம் தொகுதியில் அமமுக போட்டியில் இருந்து விலகிக் கொண்டதால், தற்போது அதிமுகவின் வெற்றி வாய்ப்பு அதிகரித்துள்ளதாக அக்கட்சியினா் தெரிவித்தனா்.