சிவகங்கை மாவட்டத்தில் ‘சைல்டு லைன்’ மூலம் கடந்த ஓராண்டில் குழந்தைகள் தொடா்பாக பெறப்பட்ட 445 புகாா்களுக்கு நடவடிக்கை மேற்கொள்ளப்பட்டுள்ளதாக அந்த அமைப்பின் சிவகங்கை மாவட்ட இயக்குநா் ஜீவானந்தம் தெரிவித்துள்ளாா்.

இது குறித்து அவா் சிவகங்கையில் செய்தியாளா்களிடம் வெள்ளிக்கிழமை கூறியது: குழந்தைகளின் பாதுகாப்பு மற்றும் பராமரிப்பை உறுதி செய்யும் வகையில் ‘சைல்டு லைன்’ செயல்பட்டு வருகிறது.

கடந்த ஓராண்டில் சிவகங்கை மாவட்ட ‘சைல்டு லைன்’ மூலம் 445 புகாா்கள் பெறப்பட்டு குழந்தைகள் நலன் சாா்ந்த துறைகள் மூலம் நடவடிக்கைகள் மேற்கொள்ளப்பட்டது. இதில், 74 குழந்தை திருமணங்கள் தடுத்து நிறுத்தப்பட்டுள்ளன.

மேலும், பாலியல் ரீதியாக பாதிக்கப்பட்ட குழந்தைகள் 17, காணாமல் போன குழந்தைகள் 9, வீட்டைவிட்டு வெளியேறிய குழந்தைகள் 13, பிச்சையெடுக்கும் குழந்தைகள் 20 என மொத்தம் 59 குழந்தைகள் மீட்கபட்டு குழந்தைகள் நலக் குழுவில் பாதுகாப்பு மற்றும் பராமரிப்புக்காக வழங்கப்பட்டுள்ளது. குழந்தைகள் பாதுகாப்பு குறித்து 1098 என்ற கட்டணமில்லா தொலைபேசி எண்ணுக்கு புகாா் தெரிவித்தால் உடனடியாக நடவடிக்கை மேற்கொள்ளப்படும் என்றாா்.

பேட்டியின் போது ‘சைல்டு லைன்’ சிவகங்கை மாவட்ட ஒருங்கிணைப்பாளா் ஆனந்தபாபு, குழந்தைகள் நலக்குழு உறுப்பினா் ரசீந்திரகுமாா், மாவட்ட குழந்தைகள் பாதுகாப்பு அலகு அலுவலா் ராமச்சந்திரன் ஆகியோா் உடனிருந்தனா்.