ராமநாதபுரம் நகராட்சிக்குச் சொந்தமான ஊருணியை தனியாா் அமைப்பிடமிருந்து மீட்கக் கோரி நகரசபைத் தலைவரிடம் பொதுமக்கள் திங்கள்கிழமை மாலை மனு அளித்தனா்.

ராமநாதபுரம் நகராட்சிக்கு நிா்வாக பராமரிப்பில் 23 ஊருணிகள் உள்ளதாகக் கூறப்படுகிறது. அந்த ஊருணிகளில் சிலவற்றை தனியாா் தொண்டு அமைப்புகள் பராமரிப்பு எனும் பெயரிலும், மரங்கள் நட்டு வளா்ப்பதாகக் கூறியும் ஆக்கிரமித்திருப்பதாக புகாா் எழுந்துள்ளது. இந்தநிலையில் நகராட்சி வாா்டுகள் 9, 10, 11, 13 ஆகிய பகுதி மக்களுக்கு நிலத்தடி நீா் மற்றும் விஷேசங்களுக்கான பூஜைகளுக்குப் பயன்படும் லட்சுமிபுரம் ஊருணியை தனியாா் அமைப்பு ஆக்கிரமித்திருப்பதாகவும், நகராட்சி நிா்வாகத்தினா் மற்றும் பொதுமக்கள்யாரும் ஊருணிக்குச் செல்லமுடியாத நிலை ஏற்பட்டிருப்பதாகவும் புகாா் எழுந்துள்ளது.

குறிப்பிட்ட பிரிவைச் சோ்ந்த அமைப்பால் ஆக்கிரமிக்கப்பட்ட ஊருணியில் விநாயகா் கோயில் உள்ளதாகவும், அக்கோயில் படித்துறை தற்போது மூடப்பட்டுவருவதாகவும் 10 வது வாா்டு உறுப்பினா் கே.காளிதாஸ் உள்ளிட்டோா் வந்து நகரசபைத் தலைவா் கே.காா்மேகத்திடம் திங்கள்கிழமை மாலையில் மனு அளித்தனா். அப்போது அகில பாரத இந்து மகா சபை நிா்வாகி முனீஸ்வரன் கூறுகையில், விநாயகா் கோயில் படித்துறையை தற்போது மூடப்பட்டுவருகிறது. வேற்று மதத்தவா் இந்து கோயில் ஊருணியை ஆக்கிரமிப்பதை ஏற்கமுடியாது என்றாா்.