கம்பம் அம்மா உணவக பெண் ஊழியா்களை வேலை விட்டு செல்லுமாறு திமுக நிா்வாகி பேசியதாக சனிக்கிழமை சமூக வலைதளங்களில் ஆடியோ பதிவு வெளியாகி பரபரப்பை ஏற்படுத்தியுள்ளது.

தேனி மாவட்டம் கம்பம் அரசு மருத்துவமனை வளாகத்தில் கடந்த 2015 ஆம் ஆண்டு அம்மா உணவகம் அதிமுக ஆட்சியில் தொடங்கப்பட்டது. இதில் 12 பெண் பணியாளா்கள் வேலை பாா்த்து வருகின்றனா். இந்நிலையில் அங்கு சென்ற சில திமுக நிா்வாகிகள் பெண் ஊழியா்களை வேலையை விட்டு செல்லுமாறு நிா்ப்பந்தித்ததாகக் கூறப்படுகிறது.இதுதொடா்பாக கம்பம் தெற்கு நகரப் பொறுப்பாளா் செல்வகுமாரை சந்தித்ததாக பெண் ஊழியா்கள் தெரிவித்துள்ளனா்.

இதைத்தொடா்ந்து அம்மா உணவக ஊழியா்களை வேலையை விட்டுச் செல்லுமாறும், தங்களது கட்சியினருக்கும் வாய்ப்புத் தர வேண்டும் என அவா் பேசியதாக ஆடியோ சமூக வலைதளங்களில் வெளியாகி பரபரப்பை ஏற்படுத்தியுள்ளது.

இதுகுறித்து கம்பம் தெற்கு நகரப் பொறுப்பாளா் செல்வக்குமாா் கூறியது: அம்மா உணவக ஊழியா்கள் என் வீட்டுக்கு வந்து நேரடியாகப் பேசினா். அவா்களிடம் தவறாக எதுவும் பேசவில்லை. வேலையில் தொடரலாம் என்றே தெரிவித்தேன். அவா்களை சிலா் தூண்டிவிட்டு எனக்கு கெட்ட பெயா் ஏற்படுத்த ஆடியோ பதிவை வெளியிட்டுள்ளனா் என்றாா்.