நீதிமன்றங்களில் காலிப் பணியிடங்களை நிரப்பக் கோரி ஆர்ப்பாட்டம்

நீதிமன்றங்களில் உள்ள காலிப் பணியிடங்களை உடனடியாக நிரப்ப வேண்டும் உள்ளிட்ட கோரிக்கைகளை வலியுறுத்தி நாகையில் திங்கள்கிழமை நீதித்துறை ஊழியர்கள் சங்கம் சார்பில் கவன ஈர்ப்பு ஆர்ப்பாட்டம் நடைபெற்றது. 
நாகை மாவட்ட நீதிமன்றம் முன் சங்க மாவட்டத் தலைவர் ஜி. ராமகிருஷ்ணன் தலைமையில் நடைபெற்ற ஆர்ப்பாட்டத்தில், மாவட்ட மாறுதல்களை கைவிட்டு, நீதிமன்ற தலைமை நிர்வாக அலுவலர்கள் மற்றும் சிரஸ்தார்களை சொந்த மாவட்டங்களிலேயே பணியமர்த்த வேண்டும், நீதிமன்றங்களில் உள்ள காலிப் பணியிடங்களை உடனடியாக நிரப்பவேண்டும், நீதிமன்ற ஊழியர்களின் பதவி உயர்வுக்கு உத்தரவாதம் அளிக்கவேண்டும், மாநில மற்றும் மாவட்ட அளவில் குறைதீர் குழுக் கூட்டங்களை  நடத்தி பணியிட மாறுதல்களை முடிவுக்குக் கொண்டு வரவேண்டும் உள்ளிட்ட கோரிக்கைகள் வலியுறுத்தப்பட்டன. ஆர்ப்பாட்டத்தில், செயலர் ஜி. பாண்டியன், பொருளாளர் கே. புகழேந்தி, துணைத் தலைவர்கள் எம். ராஜ்குமார், எம். ரவி, இணைச் செயலர்கள் ஏ.ஜி. கவிதா, பி. நேதாஜி உள்ளிட்டோர் பங்கேற்றனர்.