திமுக, எந்த மதத்தினருக்கும் எதிரானதல்ல என்று மக்களவை உறுப்பினா் தமிழச்சி தங்கப்பாண்டியன் கூறினாா்.

நீடாமங்கலத்தில் மதச்சாா்பற்ற முற்போக்குக் கூட்டணியின் தோ்தல் பிரசார பொதுக் கூட்டம் திங்கள்கிழமை இரவு நடைபெற்றது. திமுக நகர செயலாளா் ஆா். ராஜசேகரன் தலைமை வகித்தாா்.

கூட்டத்தில், சிறப்பு அழைப்பாளராக பங்கேற்று, மக்களவை உறுப்பினா் தமிழச்சி தங்கப்பாண்டியன் பேசியது:

தமிழகத்தின் தோ்தல் களத்தை தேசமே உற்று நோக்குகிறது. மதவாத கட்சியான பாஜகவை தமிழகத்தில் வளரவிடக்கூடாது. மத்திய அரசுடன் இணக்கமாக உள்ளதாக கூறிக்கொள்ளும் தமிழக அரசு, எரிவாயு மற்றும் பெட்ரோல், டீசல் விலையை குறைக்க மத்திய அரசிடம் வலியுறுத்தாதது ஏன்? இவா்களால் எங்கிருந்து 6 எரிவாயு சிலிண்டா்களை இலவசமாக வழங்க முடியும்?.

பாஜகவின் மக்கள்விரோத கொள்கைகளுக்கு எதிராக குரல் கொடுக்காத அதிமுக அரசை அகற்றி, மு.க. ஸ்டாலின் தலைமையில் திமுக அரசு அமைய மக்கள் வாக்களிக்கவேண்டும்.

மக்களிடம் உள்ள மூடநம்பிக்கைகள் ஒழியவேண்டும் என்பதில் உறுதியாக உள்ள இயக்கம் திமுக. ஆனால், எந்த மதத்தினருக்கும் எதிரானது அல்ல.

100% வெளிமாநிலத்தவரை அரசு வேலைகளில் நியமிக்கலாம் என தமிழக அரசு சட்டமே கொண்டுவந்துள்ளது. ரயில்வே, திருச்சி பொன்மலை ரயில்வே பணிமனை என பல்வேறு துறைகளிலும் வடமாநிலத்தவா்களைத்தான் பணியில் அமா்த்தப்பட்டுள்ளனா். இதன்மூலம் தமிழா்களின் வேலைவாய்ப்புகள் பறிக்கப்படுகின்றன.

தமிழக மக்கள் என்றுமே பாஜகவை ஆதரிக்க மாட்டாா்கள். இதனால், தாமரை தமிழகத்தில் மலரவே முடியாது என்பதை தில்லிக்கு உணா்த்த வேண்டும் என்றாா் தமிழச்சி தங்கப்பாண்டியன்.

கூட்டத்துக்கு நீடாமங்கலம் ஒன்றியக் குழுத் தலைவா் செந்தமிழ்ச்செல்வன், மாவட்ட காங்கிரஸ் துணைத் தலைவா் அசோகன், இந்திய கம்யூனிஸ்ட் கட்சியின் ஒன்றியச் செயலாளா் தமிழாா்வன், மாா்க்சிஸ்ட் கம்யூனிஸ்ட் கட்சியின் நகர செயலாளா் ஜோசப் ஆகியோா் முன்னிலை வகித்தனா். திமுக மற்றும் கூட்டணி கட்சியினா் கலந்துகொண்டனா்.