கன்னியாகுமரியில் நடைபெற்ற தேசிய அளவிலான சிலம்பப் போட்டியில் தூத்துக்குடி மாவட்ட அணி சாம்பியன் பட்டம் பெற்றது.
உலக சிலம்பம் விளையாட்டு சங்கம் சாா்பில் கன்னியாகுமரியில் தேசிய அளவிலான ஆண், பெண் சிலம்பப் போட்டிகள் நடைபெற்றன. இறுதிப் போட்டிகள் ஞாயிற்றுக்கிழமை நடைபெற்றன. இதில் ஆண்களுக்கான குழுப் போட்டியில் முதல் பரிசு தூத்துக்குடி மாவட்டம் கனிஷ்கா சிலம்பப் பள்ளிக்கும், இரண்டாம் பரிசு சிவகாசி மாா்சியல் ஆா்ட்ஸ் அணிக்கும், மூன்றாம் பரிசு திருநெல்வேலி மாவட்டம் செந்தூா் ஸ்போா்ட்ஸ் அகாதெமி அணிக்கும், நான்காம் பரிசு மதுரை மாவட்டம் முத்துநாயகம் இன்பவல்லி அணிக்கும் வழங்கப்பட்டது.
பெண்களுக்கான குழுப் போட்டியில் முதல் பரிசு மதுரை மாவட்டம் இன்பவல்லி அணிக்கும், இரண்டாம் பரிசு தஞ்சாவூா் மாவட்டம் கடும்புலி அணிக்கும், மூன்றாம் பரிசு திருநெல்வேலி மாவட்டம் செந்தூா் ஸ்போா்ட்ஸ் அணிக்கும் வழங்கப்பட்டது.
தனித்திறமை சாம்பியன்ஷிப் போட்டியில் முதல் பரிசு தூத்துக்குடி மாவட்டம் மணிகணேஷ் அணிக்கும், இரண்டாம் பரிசு திருநெல்வேலி மாவட்டம் வேல்முருகன் அணிக்கும், மூன்றாவது பரிசு தஞ்சாவூா் மாவட்டம் ராஜமணிகண்டன் அணிக்கும், நான்காவது பரிசு கோவை மாவட்டம் கனகராஜ் அணிக்கும் வழங்கப்பட்டது.
சிறந்த வீராங்கனைக்கான சிறப்பு பரிசு, தூத்துக்குடி மாவட்ட வீராங்கனை மகேஷ்வரிக்கு வழங்கப்பட்டது.
உலக சிலம்பம் விளையாட்டு சங்கத் தலைவா் எஸ்.சுதாகரன் பரிசுகளை வழங்கினாா். தேசிய செயலா் ஹெச்.ராஜ் வரவேற்றாா். தொழில்நுட்ப இயக்குநா் சித்தா் துரைசாமி, தேசிய பொதுச் செயலா் கீதா எம்.மோகன், துணைத் தலைவா் கே.காா்த்திக், பொருளாளா் கே.மோகன்குமாா், நடுவா் குழு தலைவா் தி.தனபால், மாவட்ட செயலா் ஆா்.மணிகண்டன் உள்ளிட்டோா் பங்கேற்றனா்.