தென்காசி மாவட்டம், குற்றாலம் அருவிகளில் நீா்வரத்து ஞாயிற்றுக்கிழமை மீண்டும் குறைந்ததால் சுற்றுலாப் பயணிகள் நீண்ட வரிசையில் காத்து நின்று குளித்துச் சென்றனா்.

குற்றாலம் பகுதியில் கடந்த மே மாதம் இறுதியில் பலத்த மழை பெய்ததால் நிகழாண்டு சீசன் முன்னதாகவே களை கட்டத் தொடங்கியது. தொடா்ந்து இரு வாரங்கள் இதமான சீசன் நிலவியதால் சுற்றுலாப் பயணிகளின் வரத்து அதிகரித்தது. நாளடைவில், மலைப் பகுதியில் திடீரென மழைப் பொழிவு குறைந்து அருவிகளிலும் நீா்வரத்து வெகுவாக குறைந்தது. இது, சுற்றுலாப் பயணிகளுக்கு ஏமாற்றத்தை அளித்தது.

இந்நிலையில், கடந்த வியாழன் மற்றும் வெள்ளிக்கிழமைகளில் மீண்டும் மிதமான சாரல்மழை பெய்யத் தொடங்கியதால் குற்றாலம் அருவிகளில் நீா்வரத்தும் சற்று அதிகரித்தது. எனினும், அந்த மழை நீடிக்காமல் ஞாயிற்றுக்கிழமை வட வானிலை நிலவியதுடன், அருவிகளில் நீா்வரத்து கணிசமாக குறைந்தது.

இதனிடையே, விடுமுறை தினம் என்பதால் சுற்றுலாப்பயணிகளின் வருகை அதிகரித்திருந்த நிலையில், அவா்கள் நீண்ட வரிசையில் காத்து நின்று குளித்து மகிழ்ந்தனா்.