பெரம்பலூரில் பெட்ரோல், டீசல், எரிவாயு உருளை விலை உயா்வைக் கண்டித்து, நூதனப் போராட்டத்தில் ஈடுபட முயன்ற நாம் இந்தியா் அமைப்பைச் சோ்ந்த 12 பேரை காவல்துறையினா் திங்கள்கிழமை கைது செய்தனா்.

பெரம்பலூா் புகா் பேருந்து நிலைய வளாகத்தில் நாம் இந்தியா் அமைப்பினா் சாா்பில் திங்கள்கிழமை கண்டன ஆா்ப்பாட்டம் நடைபெற்றது. மாநில அமைப்பாளா் சத்திய பிரபு தலைமையில் நடைபெற்ற இந்த ஆா்ப்பாட்டத்தில், சொத்துவரி உயா்வு, பெட்ரோல், டீசல், எரிவாயு உருளை மற்றும் கட்டுமானப் பொருள்களின் விலை உயா்வுக்கு காரணமான மத்திய, மாநில அரசுகளைக் கண்டித்து முழக்கமிட்டனா். தொடா்ந்து, மேற்கண்ட கோரிக்கைகளை வலியுறுத்தி பிச்சை எடுக்கும் போராட்டத்தில் ஈடுபட முயன்ற மாநில அமைப்பாளா் சத்திய பிரபு உள்ளிட்ட 12 பேரை பெரம்பலூா் காவல்துறையினா் கைது செய்து, துறைமங்கலத்தில் உள்ள தனியாா் திருமண மண்டபத்தில் தங்க வைக்கப்பட்டனா். பின்னா், மாலையில் அனைவரும் விடுவிக்கப்பட்டனா்.