ஜல்லிக்கட்டு: காளைகள் முட்டியதில் 10 பேர் காயம்

இலுப்பூர் அருகே இருந்திரப்பட்டியில் புதன்கிழமை நடைபெற்ற ஜல்லிக்கட்டில் மாடுகள் முட்டியதில் வீரர்கள் உள்பட 10 பேர் காயமடைந்தனர்.
புதுக்கோட்டை மாவட்டம் இலுப்பூர் அருகே இருந்திரப்பட்டி முத்து மாரியம்மன் கோயில் பங்குனித் திருவிழாவை ஜல்லிக்கட்டு போட்டியை மக்கள் நல்வாழ்வுத்துறை அமைச்சர் சி. விஜயபாஸ்கர், மாவட்ட ஆட்சியர் சு. கணேஷ் ஆகியோர் கொடியசைத்து தொடங்கி வைத்தனர். மாவட்ட வருவாய் ஆய்வாளர் அ. ராமசாமி, இலுப்பூர் வருவாய் கோட்டாச்சியர் ஆர். ஜெயபாரதி உள்ளிட்டோர் பங்கேற்றனர். 
பல்வேறு மாவட்டங்களில் இருந்து வந்திருந்த 695 காளைகள், 215 மாடுபிடி வீரர்களுக்கு மருத்துவக் குழுவினர் பரிசோதனை செய்து அனுமதித்தனர். 
வாடிவாசலில் முதல் காளையாக கோயில் காளையும், அதனைத் தொடர்ந்து மற்ற காளைகள் அவிழ்த்து விடப்பட்டது. ஆக்ரோஷமாக சீறிப்பாய்ந்த காளைகள் முட்டித் தள்ளியதில் மாடுபிடி வீரர்களான லட்சுமணப்பட்டி விஜய் (20), சரத் (22), இ.மேட்டுப்பட்டி ஜெயபால் (22), விஜயக்குமார் (26), பார்வையாளர் மடத்தில் இருந்த முத்துடையான்பட்டி தெய்வமணி (20), தன்னங்குடி விஜயன் (50)  உள்பட 10 பேர் காயமடைந்தனர். அவர்களுக்கு தாற்காலிக முகாமில் முதலுதவி சிகிச்சை அளிக்கப்பட்டது. மேல்சிகிச்சைக்காக இருவர் திருச்சி அரசு மருத்துவமனைக்கு அனுப்பி வைக்கப்பட்டனர்.