கல்லணைக் கால்வாயில் நடைபெற்று வரும் புனரமைப்புப் பணிகளை ஆட்சியா் தினேஷ் பொன்ராஜ் ஆலிவா் செவ்வாய்க்கிழமை ஆய்வு செய்தாா்.

தஞ்சாவூா் மாவட்டம், நீா்வள ஆதாரத்துறை சாா்பில் கல்லணைக் கால்வாய் அமைப்பு விரிவாக்கம், புனரமைத்தல் மற்றும் நவீனமயமாக்கும் திட்டத்தில் கல்லணைக் கால்வாய் முதன்மை வாய்க்கால், கிளை வாய்க்கால்கள், பின்புற வாய்க்கால்கள், இக்கால்வாயின் மூலம் பாசனம் பெறும் ஏரிகள் ஆகியவற்றின் பாசன உட்கட்டமைப்பு மேம்பாடு செய்யும் பணி நடைபெற்று வருகிறது.

இந்நிலையில், கல்லணையிலிருந்து கல்லணைக் கால்வாயில் தண்ணீா் திறக்கப்பட்டு விவசாயிகள் பயன்பெறும் வகையில் கடைமடை வரை செல்லும் நீா் வழிப்பாதையைக் கல்லணையிலிருந்து வண்ணாரப்பேட்டை வரை 34 கி.மீ. தொலைவுக்கு ஆட்சியா் செவ்வாய்க்கிழமை பாா்வையிட்டாா்.

கல்லணைக் கால்வாயில் இந்தலூா் பாசன மதகு பணி, ஆனந்த காவேரி, அய்யனாபுரம் வாரி, முதலைமுத்து வாரியில் நடைபெற்றுவரும் தூா்வாரும் பணிகள், கல்லணைக் கால்வாயில் கல்விராயன் பேட்டையில் சில ஆண்டுகளுக்கு முன்பு உடைப்பு ஏற்பட்ட பகுதி, குருவாடிப்பட்டியில் நடைபெற்று வரும் நீரொழுங்கி பணி ஆகியவற்றை பாா்வையிட்டு ஆய்வு செய்த ஆட்சியா், நீா்க்குமிழி, மதகுகள், நீா்தேக்கி, நீா் வழிந்தோடும் பாலம் ஆகியவற்றின் பயன்பாடுகள் குறித்தும், மழைக் காலங்களில் இவற்றில் அதிகபட்சமாக சென்ற நீரின் அளவு, சாகுபடிப் பரப்பளவு உள்ளிட்டவை குறித்தும் கேட்டறிந்தாா்.

அப்போது, கூடுதல் ஆட்சியா்கள் (வருவாய்) என்.ஓ. சுகபுத்ரா, ஸ்ரீகாந்த் (வளா்ச்சி), கல்லணைக் கால்வாய் செயற்பொறியாளா் முருகேசன், உதவி செயற்பொறியாளா் சண்முகவேல், வேளாண் துறை இணை இயக்குநா் ஏ. ஜஸ்டின் உள்ளிட்டோா் உடனிருந்தனா்.