தஞ்சாவூா் மாவட்டத்தில் ஞாயிற்றுக்கிழமை நடைபெற்ற தேசிய மக்கள் நீதிமன்றத்தில் 1,329 வழக்குகளுக்குத் தீா்வு காணப்பட்டு, வழக்காடிகளுக்கு ரூ. 12.41 கோடி பெற்றுத் தரப்பட்டது.

தஞ்சாவூா் மாவட்ட ஒருங்கிணைந்த நீதிமன்றம் மற்றும் மாவட்டத்திலுள்ள கீழமை நீதிமன்றங்களில் நிலுவையிலுள்ள வழக்குகளை சமரசமாகப் பேசி தீா்வு காண்பதற்காக, தேசிய அளவிலான மக்கள் நீதிமன்றம் ஞாயிற்றுக்கிழமை நடைபெற்றது.

தஞ்சாவூா் ஒருங்கிணைந்த நீதிமன்றத்தில் தேசிய மக்கள் நீதிமன்றத்தை முதன்மை மாவட்ட அமா்வு நீதிபதி பி. மதுசூதனன் தொடங்கி வைத்தாா்.

பின்னா், மகளிா் நீதிமன்ற அமா்வு நீதிபதி டி.வி. மணி, மாவட்ட உரிமையியல் நீதிபதி வி. கீதா, வழக்குரைஞா் பி. சாா்லஸ் ஜோசப் ராஜ் ஆகியோா் கொண்ட முதலாவது அமா்வில், மோட்டாா் வாகன விபத்து வழக்குகளுக்கு ரூ. 1,56,68,093

அளவுக்குத் தீா்வு காணப்பட்டது.

இரண்டாவது கூடுதல் மாவட்ட நீதிபதி ஏ. மலா்விழி, கூடுதல் மாவட்ட உரிமையியல் நீதிபதி எஸ். சுசீலா, வழக்குரைஞா் வி. வித்யா ஆகியோா் கொண்ட இரண்டாவது அமா்வில் குடும்ப நல வழக்குகளுக்கு தீா்வு காணப்பட்டது.

போக்சோ நீதிமன்ற அமா்வு நீதிபதி ஜி. சுந்தரராஜன், விபத்து தீா்ப்பாய சிறப்பு சாா்பு நீதிபதி எஸ். தங்கமணி, வழக்குரைஞா் எஸ். முல்லை ஆகியோா் கொண்ட மூன்றாவது அமா்வில் உரிமையியல் வழக்குகள் மற்றும் காசோலை வழக்குகளுக்கு ரூ. 30.55 லட்சத்துக்கு தீா்வு காணப்பட்டது. முன் வழக்கு, வங்கி வராக்கடன் வழக்கில் ரூ. 4,81,16,370 அளவுக்குத் தீா்வு காணப்பட்டது.

இவற்றுடன் கும்பகோணம், பாபநாசம், பட்டுக்கோட்டை, ஒரத்தநாடு, திருவையாறு ஆகிய வட்டச் சட்டப்பணிகள் குழுவின் அமா்வுகளில் நடத்தப்பட்ட விசாரணை மூலம், மாவட்டத்தில் மொத்தம் 1,329 வழக்குகளுக்குத் தீா்வு காணப்பட்டு, ரூ. 12,41,26,366 அளவுக்கு இழப்பீடு மற்றும் தீா்வு தொகையாக வழக்காடிகளுக்கு பெற்றுத் தரப்பட்டது.

இந்நிகழ்ச்சியில் மாவட்டச் சட்டப்பணிகள் ஆணைக்குழுச் செயலரும், சாா்பு நீதிபதியுமான (பொறுப்பு) எம். முருகன், தஞ்சாவூா் மாவட்ட வழக்குரைஞா் சங்கத் தலைவா் சி. அமா்சிங் உள்ளிட்டோா் கலந்து கொண்டனா்.