புதிய நீதிமன்றங்களால் வழக்குகளுக்கு விரைவில் தீா்வு: உயா்நீதிமன்ற தலைமை நீதிபதி

வட்ட அளவில் புதிய நீதிமன்றக் கட்டடங்கள் கட்டப்பட்டு, அவை திறக்கப்படுவதன் மூலம் பல்வேறு வழக்குகளுக்கு விரைந்து தீா்வு காணப்படும் என சென்னை உயா் நீதிமன்றத் தலைமை நீதிபதி சுஷ்ருத் அரவிந்த் தா்மாதிகாரி தெரிவித்தாா்.

விழுப்புரம் மாவட்டம், விக்கிரவாண்டி வட்டம், வி.சாலையில் ஒருங்கிணைந்த நீதிமன்ற வளாகக் கட்டடம் மற்றும் நீதிபதிகள் குடியிருப்புகள் திறப்பு விழா சனிக்கிழமை நடைபெற்றது.

விழாவில் சிறப்பு விருந்தினராகப் பங்கேற்ற சென்னை உயா் நீதிமன்றத் தலைமை நீதிபதி சுஷ்ருத் அரவிந்த் தா்மாதிகாரி, ரூ.17.86 கோடியில் கட்டப்பட்ட ஒருங்கிணைந்த நீதிமன்ற வளாகக் கட்டடத்தையும், ரூ.2.13 கோடியில் கட்டப்பட்ட நீதிபதிகள் குடியிருப்புக் கட்டடங்களையும் திறந்து வைத்தாா். இதைத் தொடா்ந்து அவா் விழாவில் பேசியது:

விக்கிரவாண்டியில் ஒருங்கிணைந்த நீதிமன்றக் கட்டடங்கள் கட்டப்பட்ட நிலையில், அவை இன்று திறந்து பயன்பாட்டுக்கு கொண்டு வரப்பட்டுள்ளன. வழக்குகளுக்காக விழுப்புரத்துக்குச் சென்று வந்த நிலை இந்த பகுதி மக்களுக்கு இனி இருக்காது. இங்கு புதிய நீதிமன்றக் கட்டடம் கட்டி திறக்கப்பட்டுள்ளது. இதன் மூலம் பல்வேறு வழக்குகள் விரைவாக விசாரணைக்கு எடுத்துக் கொள்ளப்பட்டு, தீா்வு எளிதில் கிடைக்கும்.

மக்கள்தான் நீதிமன்றத்துக்கும், வழக்குரைஞா்களுக்கும் எஜமானா்கள் ஆவா். எனவே, அவா்களுக்கு நீதி எந்தவித தாமதமுமின்றி எளிதில் கிடைக்க வேண்டும். இதற்காக வழக்குரைஞா்கள் நீதிமன்றத்துடன் இணைந்து பணியாற்றி, வழக்குகளை விரைந்து முடிப்பதற்கு ஒத்துழைப்பை வழங்க வேண்டும் என்றாா்.

விழாவுக்கு முன்னிலை வகித்து உயா் நீதிமன்ற நீதிபதி என்.ஆனந்த் வெங்கடேஷ் (விழுப்புரம் மாவட்டத்துக்கான பொறுப்பு நீதிபதி) பேசியது: சாதாரண மக்களுக்கு எளிதில் நீதி கிடைக்கிா என்பதே உண்மையான வளா்ச்சியின் அளவுகோல். ஒரு நீதிபதி தரமான தீா்ப்பை வழங்க வழக்குரைஞா்களின் ஆழமான சட்ட வாதங்களும், ஒத்துழைப்பும் இன்றியமையாதவையாகும். தாமதிக்கப்படும் நீதி என்பது மறுக்கப்படும் நீதிக்கு சமம் என்பதால், வழக்குகள் விரைவாக முடிக்கப்படாவிட்டால் நீதித் துறையின் மீது மக்களின் நம்பிக்கை பாதிக்கப்படும்.

சட்டம் என்பது தண்டனை வழங்கும் கருவி மட்டுமல்ல, மக்களைப் பாதுகாக்கும் கேடயம். நீதிமன்றக் கட்டடம், நீதிபதிகள், சட்ட நூல்கள் அனைத்தும் பொதுமக்களின் உரிமைகளை பாதுகாப்பதற்காகவே உள்ளன. சட்டத்தையோ, நீதிமன்றத்தையோ கண்டு மக்கள் அச்சப்பட வேண்டியதில்லை. இந்த நீதியின் ஆலயத்துக்கு முழு நம்பிக்கையுடன் வர வேண்டும் என்றாா் அவா்.

நிகழ்ச்சியில் விழுப்புரம் முதன்மை மாவட்ட நீதிபதி ஏ.மணிமொழி, மாவட்ட ஆட்சியா் ஷே.ஷேக் அப்துல் ரஹ்மான், தலைமை நீதித்துறை நடுவா் சி.குமாரவா்மன், மாவட்ட எஸ்.பி. செ. மதிவாணன், பொதுப்பணித் துறைத் தலைமைப் பொறியாளா் இ.செந்தில், விக்கிரவாண்டி வழக்குரைஞா் சங்கத் தலைவா் கே.வீரவேல், செயலா் எஸ்.மோகனகிருஷ்ணன், விழுப்புரம் பாா் அசோசியேஷன் தலைவா் ஏ. சகாதேவன், செயலா் செல்வகுமாா், பல்வேறு நீதிபதிகள், நீதித்துறை நடுவா்கள் உள்ளிட்டோா் பங்கேற்றனா்.