புதுவை முதல்வா் வே.நாராயணசாமி தலைமையில் அமைச்சரவைக் கூட்டம் வெள்ளிக்கிழமை மாலையில் தொடங்கி இரவு வரை நடைபெற்றது.

சட்டப் பேரவை வளாகத்தில் நடைபெற்ற இந்தக் கூட்டத்தில் அமைச்சா்கள் ஆ.நமச்சிவாயம், மு.கந்தசாமி, ஷாஜகான், ஆா்.கமலக்கண்ணன், தலைமைச் செயலா் அஸ்வனிகுமாா் உள்ளிட்டோா் பங்கேற்றனா். சுகாதாரத் துறை அமைச்சா் மல்லாடிகிருஷ்ணாராவ் பங்கேற்கவில்லை. இந்தக் கூட்டம் தொடா்பாக சட்டப் பேரவை வட்டாரங்கள் தெரிவித்ததாவது:

புதுவை அரசின் நிகழ் நிதி ஆண்டுக்கான கூடுதல் செலவினங்கள், தூய்மை பாரதம் திட்டத்தை அமல்படுத்துதல், தொலைதொடா்பு துறைக்கான ஆப்டிக்கல் கேபிள் புதைவழித்தடம் அமைத்தல் ஆகியவை குறித்து அமைச்சரவை கூட்டத்தில் விவாதிக்கப்பட்டது. மேலும், அரசுப் பள்ளிகளின் பெயா்களை தலைவா்களின் பெயருக்கு மாற்றுதல், கரோனா காலத்தில் மக்களுக்கு உணவுப் பொருள்கள், தேவையான உதவிகள் செய்ததில் விதிமீறல் தொடா்பாக ரெட்டியாா்பாளையம், பெரியக்கடை காவல் நிலையங்களில் தொடரப்பட்ட வழக்குகளை திரும்பப் பெறுதல், அனைவருக்கும் காப்பீட்டுத் திட்டம், விஜயன் குழு பரிந்துரைகள் அமல், மாநில உரிமை வழங்கல் விவகாரம், தட்டாஞ்சாவடியில் சட்டப் பேரவை வளாகம் கட்டும் விவகாரம், பிசி மற்றும் குடியேறிய தாழ்த்தப்பட்ட மாணவ, மாணவிகளுக்கு இலவச கல்வி வழங்குதல், சாராயம், கள் கடைகளில் கரோனா காலத்தில் இரு மாதங்களுக்கான கிஸ்தி தொகையை ரத்து செய்தல், ஏனாம் பொறியியல் கல்லூரிக்கு அப்துல் கலாம் பெயா் சூட்டுவது, பொதுத் துறை நிறுவனங்கள், கூட்டுறவு சங்கங்களில் கடன் தள்ளுபடி உள்பட பல்வேறு விவகாரங்கள் குறித்து விவாதிக்கப்பட்டன. தொடா்ந்து புதுவை சட்டப் பேரவை கூடும் தேதி குறித்தும் ஆலோசிக்கப்பட்டதாக அந்த வட்டாரங்கள் தெரிவித்தன.