நாட்டின் அந்நியச் செலாவணி கையிருப்பு செப்டம்பர் 20-ஆம் தேதியுடன் முடிவடைந்த வாரத்தில் 42,857 கோடி டாலராக (ரூ.30 லட்சம் கோடி) குறைந்துள்ளது என ரிசர்வ் வங்கி தெரிவித்துள்ளது.
இதுகுறித்து அந்த வங்கி வெளியிட்ட புள்ளிவிவரத்தில் கூறியுள்ளதாவது: அந்நியச் செலாவணி கையிருப்பு செப்டம்பர் 20-ஆம் தேதியுடன் நிறைவடைந்த வாரத்தில் 39 கோடி டாலர் குறைந்து 42,857 கோடி டாலராக இருந்தது. 
அந்நியச் செலாவணி கையிருப்பில் முக்கிய பங்களிப்பைக் கொண்டுள்ள வெளிநாட்டு கரன்ஸி மற்றும் தங்க சொத்துகளின் சரிவு காரணமாக இந்த நிலை ஏற்பட்டது. 
இதற்கு முந்தைய வாரத்தில் அந்நியச் செலாவணி கையிருப்பானது 65 கோடி டாலர் சரிந்து 42,896 கோடி டாலராக காணப்பட்டது. கணக்கீட்டு வாரத்தில் அந்நிய கரன்ஸி சொத்துகள் 12.5 கோடி டாலர் குறைந்து 39,667 கோடி டாலரானது. 
அதேபோன்று கையிருப்பில் உள்ள தங்கத்தின் மதிப்பும் 25.9 கோடி டாலர் சரிந்து 2,784 கோடி டாலராக இருந்தது. தொடர்ந்து இரண்டாவது வாரமாக தங்கத்தின் மதிப்பு சரிவைச் சந்தித்தது.
சர்வதேச நிதியத்தில், எஸ்டிஆர் 30 லட்சம் டாலர் அதிகரித்து 143 கோடி டாலராகவும்;  நாட்டின் கையிருப்பு நிலை 60 லட்சம் டாலர் குறைந்து 362 கோடி டாலராகவும் காணப்பட்டது என அந்தப் புள்ளிவிவரத்தில் ரிசர்வ் வங்கி தெரிவித்துள்ளது. 
நாட்டின் அன்னியச் செலாவணி கையிருப்பானது நடப்பாண்டு ஆகஸ்ட் மாதத்தில்தான் வரலாற்றில் முதல் முறையாக 43,057 கோடி டாலரைத் தொட்டது  என்பது குறிப்பிடத்தக்கது.