புதுச்சேரி காங்கிரஸார் திமுகவில் இணைந்தனர்

புதுச்சேரி சட்டப்பேரவை முன்னாள் தலைவர் ஜி.பழனிராஜா தலைமையில் காங்கிரஸ் கட்சியைச் சேர்ந்த 100 பேர் திமுக.,வில் புதன்கிழமை இணைந்தனர்.

சென்னை அண்ணா அறிவாலயத்தில் திமுக தலைவர் கருணாநிதி முன்னிலையில் பல்வேறு கட்சியினர் திமுகவில் இணையும் நிகழ்ச்சி புதன்கிழமை நடைபெற்றது.

இந்த நிகழ்ச்சியில் புதுச்சேரி சட்டப்பேரவை முன்னாள் தலைவர் ஜி.பழனிராஜா தலைமையில் காங்கிரஸ் கட்சியைச் சேர்ந்த 100 பேர் இணைந்தனர்.

புதுச்சேரி மாநில மதிமுக முன்னாள் அமைப்பாளரும், கல்வித் துறை முன்னாள் அமைச்சருமான நா.மணிமாறன் தலைமையில் மதிமுகவினர் 100 பேரும் திமுகவில் சேர்ந்தனர்.

நிகழ்ச்சியின்போது திமுக பொருளாளர் மு.க.ஸ்டாலின், துணைப் பொதுச்செயலாளர் துரைமுருகன், அமைப்புச் செயலாளர் டி.கே.எஸ்.இளங்கோவன், புதுச்சேரி மாநில திமுக அமைப்பாளர் எம்.ஏ.எஸ்.சுப்பிரமணியன் ஆகியோர் உடனிருந்தனர்.