மேகாலயாவில் நிலச்சரிவு: ஒருவர் பலி; 5 பேர் மாயம்

மேகாலயாவில் ஏற்பட்ட நிலச்சரிவில் சிக்கி ஒருவர் உயிரிழந்த நிலையில், காணாமல் போன 5 பேரை தேடும் பணி தீவிரமடைந்து வருகிறது. ஏராளமான வீடுகள் நிலச்சரிவில் புதைந்ததால் வீடுகளை இழந்த மக்கள் அவதியடைந்துள்ளனர்.

மேகாலயாவின் கிழக்கு காசி மலை மாவட்டத்தில் மவ்னி பகுதியில் இன்று (வெள்ளிக்கிழமை) காலை 6 மணியளவில் நிலச்சரிவு ஏற்பட்டது. 

இதில் தேசிய அளவிலான கிரிக்கெட் போட்டிகளில் பங்கேற்ற ரைஸியா அகமது என்ற 30 வயது பெண் நிலச்சரிவில் சிக்கி சடலமாக மீட்கப்பட்டார். மேலும் நிலச்சரிவில் சிக்கி காணாமல் போன 5 பேரை பேரிடர் மீட்புப் படையினர் உதவியுடன் உள்ளூர் மக்கள் தேடி வருகின்றனர்.

இது குறித்து பேசிய மேகாலயா கிரிக்கெட் கூட்டமைப்பின் பொதுச்செயலாளர் கிதியோன், 2011-12 ஆகிய காலகட்டங்களில் மாநில பிரதிநிதியாக தேசிய அளவிலான கிரிக்கெட் போட்டிகளில் பங்குபெற்றவர் ரஸியா. மேலும் கடந்த ஆண்டு பிசிசிஐ-யால் நடத்தப்பட்ட கிரிக்கெட் தொடரில் மேகாலயா சார்பாக விளையாடினார். அவர் நிலச்சரிவில் சிக்கி உயிரிழந்தது சோகத்தை அளிக்கிறது. ரஸியாவின் மறைவுக்கு அவரது அணியினர் இரங்கல் தெரிவித்துள்ளனர்.

மேலும் நிலச்சரிவில் ஏற்பட்ட சேதங்களை அகற்றும் பணியில் காவல்துறையினருடன் உள்ளூர் மக்களும் ஈடுபட்டுள்ளனர்.