காலத்துக்கு ஏற்ப அரசு நிா்வாக முறை மாற வேண்டும் - உயரதிகாரிகள் மத்தியில் பிரதமா் பேச்சு

குடிமக்கள் நலனுக்கு முன்னுரிமை என்ற நோக்கத்தை சிறப்பாக முன்னெடுத்துச் செல்ல அரசு நிா்வாக முறை காலத்துக்கு ஏற்ப முன்னேறவும், மாறவும் வேண்டும் என்று பிரதமா் நரேந்திர மோடி வலியுறுத்தினாா்.

இந்திய குடிமைப் பணியின் திறனை மேம்படுத்த ‘சாதனா சப்தாஹ’ என்ற பெயரில் ஒருவார கால (ஏப். 2 முதல் 8) தேசிய சிறப்பு முன்னெடுப்பு மேற்கொள்ளப்பட்டுள்ளது. இதில் அரசு ஊழியா்களின் திறனை மேம்படுத்துவது, தொழில்நுட்ப மேம்பாடு, குடிமக்களின் நன்மையை முதன்மையாகக் கொள்வது ஆகியவை முக்கிய அம்சங்களாக உள்ளன.

இதை முன்னிட்டு அரசு உயரதிகாரிகள் மத்தியில் பிரதமா் மோடி வியாழக்கிழமை காணொலி முறையில் உரையாற்றினாா். அப்போது அவா் பேசியதாவது:

இன்று தேச நிா்வாகத்தின் அடிப்படைக் கொள்கை“‘குடிமக்களை உயா்ந்தவா்களாகக் கருதுதல்’ என்பதாகும். மக்களுக்கான அரசின் சேவை என்பது அவா்களின் தேவைகளுக்கு ஏற்றவாறு திறன் மிக்கதாகவும் உணா்வுபூா்வமாகவும் மாற்றப்பட்டு வருகிறது.

‘அதிகாரி’ மனப்பான்மை வேண்டாம்: குடிமக்களின் வாழ்க்கையை மேம்படுத்த காலத்தின் வேகமான மாற்றங்களுக்கு ஏற்ப நிா்வாகத்தைத் தொடா்ந்து புதுப்பிக்க வேண்டியது அவசியம். அரசு ஊழியா்கள் தினமும் புதிய விஷயங்களைக் கற்றுக்கொள்ள வேண்டும்.

நமது நிா்வாகத்தின் மூலம் மக்களின் வாழ்க்கைத் தரம் மேம்பட வேண்டும். அதுவே உண்மையான அளவுகோலாகும். பழைய நிா்வாக முறை ‘அதிகாரி’ என்ற மனப்பான்மைக்கு அதிக முக்கியத்துவம் அளித்தது. ஆனால், இன்றைய இந்தியா கடமை உணா்வை மையமாகக் கொண்டதாக மாறியுள்ளது.

மக்களின் நம்பிக்கை: அரசு ஊழியா்களான நீங்கள் ஒவ்வொரு முடிவையும் எடுக்கும் முன், உங்கள் கடமையை சிறப்பாகச் செய்ய வேண்டும் என்று நினைத்தால், அந்த முடிவின் தாக்கம் பல மடங்கு அதிகரிக்கும். ஒரு சாதாரண குடிமகனுக்கு, அருகிலுள்ள அரசு அலுவலகமே அரசின் முகமாக உள்ளது. அரசு ஊழியா்கள் பணியாற்றும் விதமும் நடத்தையும்தான் அரசின் செயல்பாடுகள் குறித்து மக்களுக்கு நம்பிக்கையை ஏற்படுத்துகின்றன.

உலக அளவில் வேகமாக மாறும் சூழலில் இந்தியாவும் முன்னேறிக் கொண்டிருக்கிறது. எனவே, அரசு நிா்வாக அமைப்பு முறையும் தொடா்ந்து புதுப்பிக்கப்படவும், மேம்படுத்தப்படவும் வேண்டும்’ என்றாா்.

கூட்டாட்சி முறை: தொடா்ந்து இந்தியாவின் கூட்டாட்சி அமைப்பு குறித்துப் பேசிய பிரதமா் மோடி, ‘நாட்டின் வெற்றி என்பது அனைத்து மாநிலங்களின் கூட்டு வெற்றியாகும். முன்னேறிய மாநிலங்கள், பின்தங்கிய மாநிலங்கள், நாட்டின் வளா்ச்சிக்கு தடையாக உள்ள மாநிலங்கள் போன்ற பழைய பிரிவுகளை நீக்கி, மாநிலங்களுக்கு இடையே உள்ள ஏற்றத்தாழ்வுகளை ஒற்றுமையுடன் நிரப்ப வேண்டும்.

தனித்தனியான அணுகுமுறைகளை உடைத்து, ஒருங்கிணைந்த செயல்பாடு, பகிா்ந்து கொள்ளும் உணா்வு, முழுமையான அரசியல் அணுகுமுறையுடன் முன்னேற வேண்டும்; அப்போதுதான் ஒவ்வொரு திட்டமும் வெற்றி பெறும்.

அரசு ஊழியா்கள் மேம்பட வேண்டும்: இன்றைய இந்தியா கனவுகளும் இலக்குகளும் நிறைந்த நாடாக உள்ளது. அவற்றை நிறைவேற்றுவதற்கு அதிகபட்ச ஆதரவை வழங்குவது நம்முடைய பொறுப்பு. அரசு ஊழியா்கள் தங்களின் தற்போதைய பணியை எதிா்கால வளா்ச்சியுடன் இணைத்துப் பாா்க்க வேண்டும். அவா்கள் எடுக்கும் ஒவ்வொரு முடிவும் கோடிக்கணக்கான மக்களின் வாழ்க்கையை மாற்றும் என்பதை நினைவில் கொள்ள வேண்டும்.

செயற்கை நுண்ணறிவு (ஏ.ஐ.) வருகையால் உலகில் தொழில்நுட்ப மாற்றங்கள் இன்னும் வேகமாகும். ஒரு நல்ல நிா்வாகியும் அரசு ஊழியரும் தொழில்நுட்பம், தரவு பற்றிய ஆழமான புரிதலைக் கொண்டிருக்க வேண்டும். ஏனெனில், அவா்கள் முக்கிய முடிவுகளை எடுக்க அதுவே அடிப்படையாக இருக்கும்’ என்றாா்.