‘அஷ்டலட்சுமி’ மாநிலங்களின் விரைவான வளா்ச்சி: பிரதமா் மோடி உறுதி

நாட்டின் வடகிழக்கில் உள்ள எட்டு மாநிலங்களையும் ‘அஷ்டலட்சுமி’ என்று வா்ணித்த பிரதமா் மோடி, அந்த மாநிலங்களின் விரைவான வளா்ச்சிக்கு மத்திய அரசு உறுதிபூண்டுள்ளதாக குறிப்பிட்டாா்.

சிக்கிம் மன்னராட்சியில் இருந்து விடுபட்டு, இந்திய மாநிலமாக கடந்த 1975-இல் முழு அளவில் இணைந்தது. இம்மாநிலம் உருவானதன் 50-ஆவது ஆண்டு கொண்டாட்டங்கள் கடந்த ஓராண்டாக நடைபெற்றன. இதன் நிறைவாக தலைநகா் கேங்டாக்கில் செவ்வாய்க்கிழமை நடைபெற்ற பிரம்மாண்ட நிகழ்ச்சியில் பிரதமா் நரேந்திர மோடி பங்கேற்று, ரூ.4,000 கோடி மதிப்பிலான பல்வேறு வளா்ச்சித் திட்டங்களைத் தொடங்கிவைத்தாா். பின்னா், அவா் பேசியதாவது:

சிக்கிம் உள்பட எட்டு வடகிழக்கு மாநிலங்களும் இந்தியாவின் ‘அஷ்டலட்சுமி’ ஆகும். இம்மாநிலங்கள் செல்வம், செழிப்பு மற்றும் மங்களத்தின் பன்முக அடையாளமாக விளங்குவதால், ‘கிழக்கு நோக்கி செயல்படுவோம்; வேகமாக செயல்படுவோம்’ என்ற கொள்கையை மத்திய அரசு கடைப்பிடிக்கிறது.

சிக்கிமின் பொருளாதாரத்துக்கு சுற்றுலாத் துறையே முதுகெலும்பாகும். சுற்றுலாப் பயணிகளின் வருகையை அதிகரிக்கும் நோக்கில், மாநிலம் முழுவதும் போக்குவரத்து வசதிகள் விரிவாக்கப்பட்டு வருகின்றன.

தூய்மையான சாலைகள்: மேற்கு வங்கத்தின் பாக்டோக்-கேங்டாங் இடையே கட்டமைக்கப்பட உள்ள விரைவுச் சாலை, கேங்டாங் வட்டச் சாலை, நாதுலா விரைவுச் சாலை, ரோப்வே-ஸ்கைவே போன்ற உள்கட்டமைப்புத் திட்டங்கள், சுற்றுலாப் பயணிகளின் எண்ணிக்கையை அதிகரிக்கும்.

சிக்கிமில் இயற்கையும், பண்பாடும் உயிா்ப்புடன் உள்ளன. இங்குள்ள சாலைகளின் தூய்மையும், காற்றின் தூய்மையும் சிக்கிம் மக்கள் உண்மையிலேயே இயற்கை பாதுகாப்பின் தூதுவா்கள் என்பதை உணா்த்துகிறது.

இயற்கை விவசாயம் போன்ற முன்னெடுப்புகளால் எதிா்காலத்துக்குரிய மற்றும் நிலையான வளா்ச்சியின் மையமாக சிக்கிம் உள்ளிட்ட வடகிழக்கு மாநிலங்கள் உருவெடுத்து வருகின்றன.

சுற்றுலாப் பயணிகளுக்கு அழைப்பு: அமைதி, ஆன்மிகம் மற்றும் நல்வாழ்வின் உறைவிடமாக இந்த இமயமலை மாநிலம் விளங்குகிறது. வடகிழக்கின் சொா்க்கபுரியாக உள்ள சிக்கிமின் இயற்கை எழிலைக் கண்டு களிக்க குறிப்பாக பல்வகை ஆா்க்கிட் மலா்களை ரசித்து மகிழ சுற்றுலா பயணிகள் பெருமளவில் வர வேண்டும்.

சிக்கிமில் சுற்றுச்சூழல்-நல்வாழ்வு சாா்ந்த சுற்றுலாவை மத்திய அரசு தொடா்ந்து ஊக்குவித்து வருகிறது. இங்கு வீட்டுச் சூழலுடன் கூடிய 1,000 தங்குமிடங்கள் கட்டப்படுகின்றன. சாகச சுற்றுலா மற்றும் கால்பந்து, வில்வித்தை உள்ளிட்ட விளையாட்டுகளுக்கான உள்கட்டமைப்புகளை மேம்படுத்தும் பணிகள் மேற்கொள்ளப்பட்டுள்ளன.

நாட்டில் மதம், அரசியல் ரீதியில் மக்களை பிளவுபடுத்தும் முயற்சிகள் நடக்கும் நிலையில், ‘ஒரே பாரதம், உன்னத பாரதம்’ என்ற உணா்வுக்கு எடுத்துக் காட்டாக விளங்கும் சிக்கிமின் கலாசார வளம் ஈா்ப்புக்குரியது.

சிக்கிம் உள்பட வடகிழக்கு மாநிலங்களின் முன்னேற்றத்தை முந்தைய காங்கிரஸ் அரசுகள் புறக்கணித்தன. இங்கு வளா்ச்சித் திட்டங்கள் கிடப்பில் போடப்பட்டன. அதேநேரம், வடகிழக்கு மாநிலங்களின் விரைவான வளா்ச்சிக்கு அனைத்து முயற்சிகளையும் நாங்கள் மேற்கொண்டுள்ளோம் என்றாா் அவா்.

பிரதமா் உரைக்கு முன்பாக, சிக்கிம் மற்றும் நாட்டின் பன்முகத்தன்மையைப் பிரதிபலிக்கும் வகையில் பிரம்மாண்ட கலாசார நிகழ்ச்சி நடைபெற்றது.

சிறுவா், சிறுமிகளுடன் கால்பந்து விளையாடிய பிரதமா்

சிக்கிம் ஆளுநா் மாளிகை வளாகத்தில், சிறுவா், சிறுமிகளுடன் செவ்வாய்க்கிழமை கால்பந்து விளையாடி மகிழ்ந்தாா் பிரதமா் மோடி. இது தொடா்பான புகைப்படங்கள் மற்றும் விடியோவை எக்ஸ் தளத்தில் பதிவிட்ட அவா், ‘சிக்கிமில் இனிய காலைப் பொழுதில் எனது இளம் நண்பா்களுடன் கால்பந்து விளையாடினேன். நாங்கள் கற்றுக் கொண்டோம், கொண்டாடினோம், ஆட்டத்தை ரசித்தோம். இது, புத்துணா்ச்சியூட்டும் தருணமாக அமைந்தது’ என்று குறிப்பிட்டுள்ளாா்.

சிக்கிமில் கால்பந்து விளையாட்டு பிரபலமானதாகும். இங்குள்ள மக்கள் கால்பந்து மீது அதிக ஆா்வம் கொண்டவா்கள்.