அதிமுக (புரட்சி தலைவி அம்மா) சார்பில் ஆர்.கே.நகர் தொகுதிக்கான தேர்தல் அறிக்கை 108 வாக்குறுதிகளுடன் திங்கள்கிழமை வெளியிடப்படும் என அக்கட்சியின் முன்னணி தலைவர்களில் ஒருவரான முன்னாள் அமைச்சர் மாஃபா பாண்டியராஜன் ஞாயிற்றுக்கிழமை தெரிவித்தார்.

சென்னை ஆர்.கே.நகர் தொகுதியில் தேர்தல் பிரசாரத்தில் ஈடுபட்டிருந்த பாண்டியராஜன் செய்தியாளர்களிடம் கூறியது:
ஆர்.கே.நகர் தொகுதியில் முதன்முதலாக கட்டப்பட்ட வைத்தியநாதன் பாலம், துணைமின் நிலையம் ஆகியவை மதுசூதனன் சட்டப்பேரவை உறுப்பினராக இருந்தபோதுதான் கட்டப்பட்டவை ஆகும்.
இத்தொகுதியில் அனைத்துத் தரப்பு மக்களாலும் ஏற்றுக்கொள்ளப்பட்டவராக மதுசூதனன் உள்ளார். இங்கு மறைந்த முதல்வர் ஜெயலலிதா விட்டுச் சென்ற பணிகளை மதுசூதனன் தொடர்வார்.
இத்தொகுதியில் மேற்கொள்ள வேண்டிய திட்டங்கள், வாக்குறுதிகள் அடங்கிய தேர்தல் அறிக்கை திங்கள்கிழமை வெளியிடப்பட உள்ளது.
வாக்குச்சீட்டு அல்லது மின்னணு வாக்குப் பதிவு இயந்திரமா என்று கேட்கப்படுகிறது. தற்போது வேட்புமனு தாக்கல் செய்தவர்களில் 18 பேர் மனுக்களைத் திரும்பப் பெற்றுவிட்டாலே போதும்; மின்னணு வாக்குப் பதிவு இயந்திரம் மூலம் வாக்குப்பதிவு செய்ய முடியும் என்றார் பாண்டியராஜன்.