உரிமையியல் நீதிபதி பணியிடங்கள்: மதிப்பெண் பட்டியல் வெளியீடு

உரிமையியல் நீதிபதி பணியிடங்களுக்கான ஒருங்கிணைந்த மதிப்பெண் பட்டியலை தமிழ்நாடு அரசுப் பணியாளர் தேர்வாணையம் (டி.என்.பி.எஸ்.சி.) வெளியிட்டது.
இதுகுறித்து, டி.என்.பி.எஸ்.சி. திங்கள்கிழமை வெளியிட்ட அறிவிப்பு:-
மாநில நீதிப் பணியில் 320 உரிமையியல் நீதிபதி பணியிடங்களுக்கு விண்ணப்பதாரர்களைத் தெரிவு செய்ய முதல்நிலை எழுத்துத் தேர்வு கடந்த ஜூனிலும், முதன்மை எழுத்துத் தேர்வு ஆகஸ்ட்டிலும் நடத்தப்பட்டன. அதில் தேர்ச்சி பெற்றவர்கள் கடந்த செப்டம்பர் 27 முதல் அக்டோபர் 5 -ஆம் தேதி வரை நடைபெற்ற நேர்காணலில் பங்கேற்றனர். இதையடுத்து, இதற்கான ஒருங்கிணைந்த மதிப்பெண் பட்டியல் தேர்வாணைய இணையதளத்தில் (www.tnpsc.gov.in)  வெளியிடப்பட்டுள்ளது. இதுவரை நடந்த உரிமையியல் நீதிபதி பதவிக்கான தேர்வுகளில், மிகக் குறுகிய காலத்தில், அதாவது 5 மாதங்கள் 26 நாள்களில் இந்தத் தேர்வு முடிவுகள் வெளியிடப்பட்டுள்ளது குறிப்பிடத்தக்கது 
என டி.என்.பி.எஸ்.சி. தெரிவித்துள்ளது.