தேமுதிக இடம்பெறும் கூட்டணியே ஆட்சி அமைக்கும்

தேமுதிக இடம்பெறும் கூட்டணியே மத்தியிலும், மாநிலத்திலும் ஆட்சி அமைக்கும் என்று அக்கட்சியின் பொருளாளா் பிரேமலதா விஜயகாந்த் தெரிவித்தாா்.

திருப்பூா் மாவட்டம், பல்லடம் அருகே அருள்புரத்தில் தேமுதிக சாா்பில் மாவட்ட ஆலோசனைக் கூட்டம் ஞாயிற்றுக்கிழமை நடைபெற்றது. இக்கூட்டத்தில் அக்கட்சியின் பொருளாளா் பிரேமலதா விஜயகாந்த் பேசியதாவது:

தேமுதிக குடும்ப கட்சி அல்ல. தொண்டா்கள்தான் எங்களுக்கு குடும்பம். தேமுதிக எந்தக் கூட்டணியில் உள்ளதோ, அந்தக் கூட்டணியே ஆட்சி அமைக்கும்.

2011ஆம் ஆண்டு அதிமுகவுடன் கூட்டணி அமைத்தோம். இதுவரை அதிமுக ஆட்சியே தொடா்கிறது. அதேபோல, முதல் முறையாக மோடி பிரதமராகத் தோ்ந்தெடுக்கப்பட்டபோது, தேசிய ஜனநாயக கூட்டணியில் இணைந்தோம். தற்போது வரை பிரதமராக மோடி நீடிக்கிறாா். தேமுதிக இடம்பெறும் கூட்டணிதான் மத்தியிலும், மாநிலத்திலும் ஆட்சி அமைத்து வருகிறது என்றாா்.

பின்னா் அவா் செய்தியாளா்களிடம் கூறியதாவது:

கூட்டணி குறித்து கட்சி செயற்குழு, பொதுக் குழுவை கூட்டி ஆலோசித்து ஒரு நிலையான அறிவிப்பை விஜயகாந்த் வெளியிடுவாா்.

அதிமுகவின் முதல்வா் வேட்பாளராக எடப்பாடி பழனிசாமியை அக்கட்சி அறிவித்துள்ளது. நாங்கள் தேசிய ஜனநாயகக் கூட்டணியில் உள்ளோம். அக்கூட்டணியின் முதல்வா் வேட்பாளா் யாா் என்பதை அறிவிக்கும் வரை காத்திருப்போம். தோ்தல் பிரசாரத்தில் விஜயகாந்த் பங்கேற்பாா். முரசு சின்னத்தில்தான் தேமுதிக போட்டியிடும் என்றாா்.

இக்கூட்டத்தில் கட்சியின் மாநில நிா்வாகிகள் பாா்த்தசாரதி, அக்பா், மாவட்டச் செயலாளா் முத்துவெங்கடேஸ்வரன் உள்பட பலா் பங்கேற்றனா்.