சுருங்கி விரியும் ட்ரோன்!

ஆளில்லாத சிறிய விமானங்கள் என்று அழைக்கப்படும் "ட்ரோன்'கள் இன்றைய நவீன கால உலகத்துக்கு அத்தியாவசிய தேவையாகிவிட்டது. பொழுதுபோக்குக்காக மட்டுமன்றி, பேரிடர் காலங்களிலும் இந்த ட்ரோன்களின் சேவை முக்கியத்துவம் வாய்ந்ததாக உள்ளது.
ஆபத்து காலங்களில் மனிதர்கள் நுழைய முடியாத இடங்களிலும், இந்த ட்ரோன்கள் எந்தவித தயக்கமுமின்றிச் சென்று களநிலவரத்தைக் கண்டறிவது மீட்பு பணிகளுக்கு பெரும் உதவியாக அமைகிறது.
அதிக எடையை தாங்கிச் செல்வது, வேகமாகச் செல்வது ஆகியவற்றின் அடிப்படையில்தான் ட்ரோன்களின் நவீனமயம் கணக்கிடப்பட்டு வந்தது. இதில் அடுத்தகட்டமாக, சுருங்கி விரியும் ட்ரோன்கள் கண்டுபிடிக்கப்பட்டுள்ளன. 
ஸ்விட்சர்லாந்தின் ஜூரிச் பல்கலைக்கழகத்தின் ஆராய்ச்சியாளர்கள் இந்த சுருங்கி விரியும் ட்ரோன்களின் தொழில்நுட்பத்தைக் கண்டுபிடித்துள்ளனர். பறவைகள் பறக்கும்போதே தனது உடல் அமைப்பை குறுகிய பாதைகளுக்கு ஏற்ப மாற்றி அமைத்து செல்வதைப் பார்த்து இந்த வகையிலான ட்ரோன்களை உருவாக்க திட்டமிட்டதாக ஆராய்ச்சியாளர்கள் தெரிவிக்கின்றனர். 
இதற்கு "மார்பிங்' ட்ரோன்கள் என்று பெயரிட்டுள்ளன. வழக்கமாக ட்ரோன்கள் "x' வடிவில்தான் இருக்கும். இதை "T', "H', "O' போன்ற வடிவில் பறக்கும்போதே மாற்றிக் கொள்ளலாம். இதற்காக ட்ரோன்களின் நான்கு இறக்கைகளும் மடிந்து விரியும் வகையில் சிறிய மோட்டார்கள் இணைக்கப்பட்டுள்ளன. அதேநேரத்தில் ட்ரோன் பறப்பதற்கும் இடையூறு ஏற்படாத வகையில் இது துல்லியமாக அமைக்கப்பட்டுள்ளது.
சுவரில் சிறிய துளை, ஜன்னல் சந்து போன்றவவற்றுக்கு ஏற்ப இந்த ட்ரோன்களைச் சுருக்கி உள்ளே செலுத்திய அடுத்த நொடியில் மீண்டும் பழைய நிலைக்கே விரிவடையும். இது ட்ரோன்களின் நவீனமயமாக்களில் மைல் கல்லாகக் கருதப்படுகிறது.
அ.சர்ஃப்ராஸ்