நீதிமன்ற அவமதிப்பு வழக்கில் சிறைத் தண்டனை அனுபவித்து வந்த சர்ச்சைக்குரிய இலங்கை பெளத்த துறவி கலகொட ஞானசாராவுக்கு, அந்த நாட்டு அதிபர் மைத்ரிபால சிறீசேனா பொதுமன்னிப்பு வழங்கியுள்ளார்.
இதுகுறித்து தகவல்கள் தெரிவிப்பதாவது:
பௌத்த துறவியும், பொதுபல சேனையின் தலைவருமான கலகொட ஞானசாரா, கடந்த 2013-ஆம் ஆண்டு முதல் முஸ்லிம்களுக்கு எதிராக வன்முறையைத் தூண்டும் வகையில் பிரசாரம் செய்து வருவதாக குற்றம் சாட்டப்படுகிறது.
இந்த நிலையில், பத்திரிகையாளர் ஒருவர் மாயமானது தொடர்பாக கடந்த 2016-ஆம் ஆண்டு நடைபெற்ற வழக்கு விசாரணையின்போது நீதிமன்றத்துக்குள் அத்துமீறி நுழைந்தது, அங்கிருந்தவர்களை மிரட்டியது, நீதிமன்ற செயல்பாடுகளுக்கு இடையூறு விளைவித்தது உள்ளிட்ட குற்றச்சாட்டுகளின் பேரில், அவருக்கு 6 ஆண்டுகள் சிறைத் தண்டனை விதிக்கப்பட்டது.
இந்த நிலையில், புத்தர் ஜெயந்தியை முன்னிட்டு 762 சிறைக் கைதிகளுக்குப் பொதுமன்னிப்பு வழங்கிய அதிபர் மைத்ரிபால சிறீசேனா, தற்போது கலகொட ஞானசாராவுக்கும் பொதுமன்னிப்பு வழங்கியுள்ளதாக தகவல்கள் தெரிவிக்கின்றன.
இலங்கையில் 3 தேவாலயங்கள் மற்றும் 3 நட்சத்திர விடுதிகளில் தேசிய தவ்ஹீத் ஜமாத் பயங்கரவாத அமைப்பு நடத்திய தற்கொலைத் தாக்குதலில் 258 பேர் உயிரிழந்தனர்.
தேசிய தவ்ஹீத் ஜமாத் அமைப்பு பயங்கரவாத உள்நோக்கத்துடன் செயல்படுவதாக கடந்த 2013-ஆம் ஆண்டே கலகொட ஞானசாரா குற்றம் சாட்டியிருந்தார்.
ஈஸ்டர் தினத் தாக்குதலைத் தொடர்ந்து, குருணாகல், கம்பஹா உள்ளிட்ட பகுதிகளில் மசூதிகள், முஸ்லிம் சமுதாயத்தினரின் வீடுகள், கடைகள் ஆகியவை அடித்து நொறுக்கப்பட்டன.
இந்தச் சூழலில் ஞானசாராவுக்கு பொதுமன்னிப்பு வழங்கப்பட்டுள்ளது குறிப்பிடத்தக்கது.