ட்வீட்டுக்குக் கிளம்பிய எதிர்ப்புகள்: நடிகர் விவேக் விளக்கம்!

கோடை விடுமுறையைப் பயனுள்ளதாகக் கழிப்பது எப்படி என்று நடிகர் விவேக் வழங்கிய அறிவுரை சர்ச்சையை உருவாக்கியுள்ளது.

நடிகர் விவேக், ட்விட்டரில் இன்று தெரிவித்ததாவது:

அன்புள்ள மாணவர்களே, குழந்தைகளே! கோடை வெயிலாக இருந்தாலும் உங்கள் விடுமுறையை மகிழ்ச்சியாகக் கொண்டாடவும். விளையாடி முடித்தபிறகு நிறைய தண்ணீர் குடிக்கவும். மாணவிகள், தங்கள் அம்மாக்களுக்குச் சமையலறையில் உதவுங்கள். கூடவே சமையலையும் கற்றுக்கொள்ளுங்கள். மாணவர்கள், தங்களுடைய அப்பாவின் அலுவலகத்துக்குச் சென்று, அவர் குடும்பத்துக்காக எப்படியெல்லாம் பாடுபடுகிறார் என்று தெரிந்துகொள்ளுங்கள் என்று ட்வீட் செய்திருந்தார்.

விவேக்கின் இந்த ட்வீட்டுக்கு உடனடியாக எதிர்ப்புகள் கிளம்பின. பெண்கள் என்றால் சமையலறைக்கும் ஆண்கள் என்றால் பணியிடங்களுக்கும்தான் செல்லவேண்டுமா? ஏன், மாணவர்கள் சமையலறைக்கும் மாணவிகள் பணியிடங்களுக்கும் செல்லக்கூடாதா என்கிற கேள்வியை எழுப்பிப் பலரும் விவேக்கின் ட்வீட்டுக்குக் கண்டனம் தெரிவித்தார்கள்.

இதையடுத்து தன்னுடைய ட்வீட்டுக்கு விளக்கம் அளித்து விவேக் கூறியதாவது: தாயிடம் இருந்து சமையலையும் தந்தையிடம் இருந்து கடின உழைப்பையும் இந்த விடுமுறைக் காலத்திலாவது தெரிந்து கொள்க என்ற என் பதிவை அனைத்து பெற்றோரும் ஆமோதிப்பர். என்னைப் புரிந்து கொண்ட உங்களுக்கு நன்றி என்று கூறியுள்ளார்.