தமிழ்த் திரைப்பட தயாரிப்பாளர் சங்கத் தேர்தல் அறிவிப்பு

தமிழ்த் திரைப்படத் தயாரிப்பாளர்கள் சங்கத்திற்கான தேர்தல் தேதி அறிவிக்கப்பட்டுள்ளது. 

இதுதொடர்பாக அச்சங்கம் வெளியிட்டுள்ள அறிவிப்பில், 

கடந்த ஜனவரி 23ஆம் தேதி தென்னிந்திய திரைப்பட வர்த்தக சபை வளாகத்தில் தமிழ்த் திரைப்படத் தயாரிப்பாளர்கள் சங்கத்தின் செயற்குழு கூட்டம் நடைபெற்றது. 

அதில் 2023-26ஆம் ஆண்டிற்கான நிர்வாகக்குழு மற்றும் செயற்குழு உறுப்பினர்களைத் தேர்ந்தெடுப்பதற்கான தேர்தல் வரும் 26.03.2023 ஞாயிற்றுக்கிழமை நடத்தலாம் எனத் தீர்மானிக்கப்பட்டுள்ளது. 

இதையும் படிக்க | விறுவிறுப்புக்கு பஞ்சமில்லாத ‘ரன் பேபி ரன்’: திரை விமர்சனம்

23.02.2023 காலை 11 மணி முதல் 26.02.2023 மாலை 5 மணி வரை வேட்புமனுக்கள் வழங்கப்படும் எனவும், பூர்த்தி செய்யப்பட்ட வேட்புமனுக்களை 2.3.2023ஆம் தேதிக்குள் சமர்ப்பிக்க வேண்டும் எனவும் தெரிவிக்கப்பட்டுள்ளது. விண்ணப்பங்களைத் திரும்பப் பெற 05.03.2023 கடைசி தினம். அன்றைய தினம் மாலை 6 மணியளவில் இறுதி வேட்பாளர்கள் அறிவிக்கப்படுவர் எனத் தெரிவிக்கப்பட்டுள்ளது. 

தயாரிப்பாளர் சங்கத் தேர்தல் 26.03.2023 காலை 8 மணி முதல் மாலை 4 மணி வரை நடைபெறும். வாக்கு எண்ணிக்கை மாலை 5 மணிக்கு நடைபெறும் எனவும் அந்த அறிக்கையில் குறிப்பிடப்பட்டுள்ளது.