அர்ஜுன் தாஸின் கான் சிட்டி! தம்பி ராமையா, ரமேஷ் திலக் கதாபாத்திரங்கள் அறிமுகம்!

நடிகர் அர்ஜுன் தாஸ் நடிப்பில் உருவாகியுள்ள “கான் சிட்டி” திரைப்படத்தின் புதிய கதாபாத்திர அறிமுக போஸ்டர்கள் வெளியாகியுள்ளன.

அறிமுக இயக்குநர் ஹரிஷ் துரைராஜ் இயக்கத்தில் நடிகர் அர்ஜுன் தாஸ் நாயகனாக நடித்துள்ள புதிய திரைப்படம் “கான் சிட்டி”. இப்படத்தில், நடிகர்கள் அனா பென், யோகி பாபு, வடிவுக்கரசி ஆகியோர் முதன்மைக் கதாபாத்திரங்களில் நடித்துள்ளனர்.

இசையமைப்பாளர் ஷான் ரோல்டன் இசையில், புதுமையான கதைக்களத்துடன் உருவாகியுள்ள இப்படத்தை பவர் ஹவுஸ் பிக்சர்ஸ் நிறுவனம் தயாரித்துள்ளது.

ஏற்கெனவே, “கான் சிட்டி” படத்தில் நடித்துள்ள நடிகர்கள் பொன்வண்ணன், பரத்வாஜ் ரங்கன், இமான் அண்ணாச்சி மற்றும் மதன் ஆகியோரின் கதாபாத்திர அறிமுக போஸ்டர்கள் வெளியாகி ரசிகர்களிடையே வரவேற்பைப் பெற்றுள்ளன.

இந்த நிலையில், தமிழ்த் திரையுலகின் பிரபல குணச்சித்திர நடிகர்களான தம்பி ராமையா மற்றும் ரமேஷ் திலக் ஆகியோரின் கதாபாத்திர அறிமுக போஸ்டர்களை வியாழக்கிழமை (ஏப். 2) அன்று படக்குழுவினர் வெளியிட்டுள்ளனர்.

இந்தப் படத்தில், நடிகர் தம்பி ராமையா “அமைச்சர் வரதராஜ்” எனும் கதாபாத்திரத்திலும், நடிகர் ரமேஷ் திலக் “டாக்டர் சுப்ரமணி” எனும் கதாபாத்திரத்திலும் நடித்துள்ளனர்.