அட்லீ, விஜய் சேதுபதி, சாய் அபயங்கர்..! பத்தா படக்குழுவை நேரில் பாராட்டிய கமல்ஹாசன்!

நடிகர் விஜய் சேதுபதி நாயகனாக நடித்த "பத்தா" திரைப்படக் குழுவை நடிகரும், மாநிலங்களவை உறுப்பினருமான கமல்ஹாசன் நேரில் அழைத்து பாராட்டியுள்ளார்.

நடிகர் விஜய் சேதுபதி - இயக்குநர் பாலாஜி தரணிதரன் கூட்டணியில் வெளியான 3 ஆவது திரைப்படம் “பத்தா”. கடந்த வியாழக்கிழமை (அக்.1) திரையரங்குகளில் வெளியான இந்தப் படம் ரசிகர்களிடையே நல்ல வரவேற்பைப் பெற்றுள்ளது.

இசையமைப்பாளர் சாய் அபயங்கர் இசையில், இயக்குநர் அட்லீ தயாரிப்பில் உருவான இந்தப் படத்தில் நடித்த குழந்தை நட்சத்திரம் சாய் பிருத்விராஜின் நடிப்புக்குப் பலரும் பாராட்டுகளைத் தெரிவித்து வருகின்றனர்.

இந்த நிலையில், பத்தா திரைப்படத்தின் நாயகன் விஜய் சேதுபதி, இயக்குநர் பாலாஜி தரணிதரன், தயாரிப்பாளர் அட்லீ, இசையமைப்பாளர் சாய் அபயங்கர், நடிகர்கள் ஹரி கிருஷ்ணன், அர்ஜுன் சிதம்பரம் உள்ளிட்டோரை நடிகர் கமல்ஹாசன் இன்று (அக். 7) நேரில் அழைத்து பாராட்டியுள்ளார்.

முன்னதாக, பத்தா திரைப்படத்துக்கு ரசிகர்கள் அளித்த வரவேற்பால் கூடுதல் திரைகள் ஒதுக்கப்பட்டுள்ளது குறிப்பிடத்தக்கது.