அருணாசலப் பிரதேசத்தில் சுரங்க பணிகளை சீனா மேற்கொள்ளவில்லை: மத்திய அரசு

அருணாசலப் பிரதேச மாநிலத்தில் சுரங்க வேலைகள் எதையும் சீனா மேற்கொள்ளவில்லை என்று மக்களவையில் மத்திய அரசு வியாழக்கிழமை தெரிவித்துள்ளது. அத்துடன், அருணாசலப் பிரதேசம் இந்தியாவின் ஒன்றிணைந்த பகுதி மற்றும் யாராலும் பிரிக்க முடியாத பகுதி என்று உறுதியாக கூறியுள்ளது.
அருணாசலப் பிரதேசத்தில் சீனா சுரங்க வேலைகளில் ஈடுபட்டிருப்பதை மத்திய அரசு அறிந்திருக்கவில்லையா? என்று மாநிலங்களவையில் கேள்வி எழுப்பப்பட்டது.
இந்த கேள்விக்கு வெளியுறவுத் துறை இணைஅமைச்சர் வி.கே. சிங் எழுத்துப்பூர்வமாக அளித்துள்ள பதிலில், இந்தியாவுக்கு சொந்தமான அருணாசலப் பிரதேசத்தின் பகுதியில் சீனா எந்த வித பணியும் மேற்கொள்ளவில்லை ' என்று பதிலளிக்கப்பட்டிருந்தது.
மேலும் கிழக்கு பகுதியில் அருணாசலப் பிரதேசத்தில் இருக்கும் இந்தியாவுக்கு சொந்தமான 90,000 ச.கி.மீ. நிலப்பரப்பை சீனா சொந்தம் கொண்டாடி வருகிறது. 
ஆனால் உண்மையில் அருணாசலப் பிரதேசம் இந்தியாவின் ஒன்றிணைந்த பகுதி மற்றும் யாராலும் பிரிக்க முடியாத பகுதி என்பதை பலமுறை சீனாவிடம் திட்டவட்டமாக கூறப்பட்டுள்ளது என்று சிங் தெரிவித்தார்.
கடந்த மே மாதம் அருணாசலப் பிரதேச பகுதியில் தங்கம், வெள்ளி மற்றும் பல மதிப்புமிக்க கனிமங்கள் இருப்பதாகவும், அந்த பகுதியில் சீனா சுரங்க வேலைகளில் ஈடுபட்டிருப்பதாகவும் ஊடகங்கள் தகவல் தெரிவித்திருந்தன.