சதாம் ஹுசேன் பாணியில் மீன் குழம்பில் தாலியம் கலந்து கொடுத்த கொடூரன்

சதாம் ஹுசேன் பாணியில், தனது மனைவி மற்றும் அவரது குடும்பத்தைக் கொலை செய்ய மீன் குழம்பில் தாலியத்தைக் கலந்து கொடுத்திருக்கிறார் தில்லியைச் சேர்ந்த கொடூரன்.

தாலியம் என்ற விஷம் கலந்த உணவைச் சாப்பிட்ட மனைவியின் தாய் மற்றும் தங்கை பலியான நிலையில், மனைவியோ கோமா நிலையில் மருத்துவமனையில் அனுமதிக்கப்பட்டுள்ளார். இந்த குற்றச் செயலில் ஈடுபட்ட 37 வயதாகும் வருண் அரோராவை காவல்துறையினர் கைது செய்துள்ளனர்.

சதாம் ஹுசேன், தனது எதிரிகளைக் கொல்ல தாலியம் என்ற விஷத்தை உணவில் கலந்து கொடுத்து விடுவார் என்றும், அது மெல்ல, எதிரிகளின் உடலில் பாய்ந்து சில நாள்களில் அவர்கள் இறந்து விடுவார்கள் என்றும் கூறப்படுகிறது.

அந்த பாணியைப் பின்பற்றி, குடும்பத் தகராறு காரணமாக மனைவி மற்றும் அவரது குடும்பத்தார் மீது அதிருப்தியில் இருந்த வருண் அரோரா, தாலியத்தை, மீன் குழம்பில் கலந்து கொடுத்துள்ளார்.

ஒரு சில மாதங்களில், மனைவி ரத்தத்தில் விஷம் கலந்து கோமா நிலையில் மருத்துவமனையில் அனுமதிக்கப்பட்டார். அதே நிலையில் மனைவியின் தாய் அனிதா மற்றும் தங்கை பிரியங்கா ஆகியோர் உடல்நிலை பாதிக்கப்பட்டு சிகிச்சை பலனின்றி பலியானார்கள்.

தாலியத்தின் பாதிப்பினால் மனைவியின் தந்தையும், வீட்டில் வேலை செய்யும் பெண்ணும் உடல்நலக் குறைவுக்காக சிகிச்சை பெற்று வரும் நிலையில், காவல்துறையினர் தடயவியல் நிபுணர்களை, சம்பந்தப்பட்ட வீட்டுக்கு அனுப்பினர். அங்கு அவர்கள் தாலியத்தைக் கண்டுபிடித்தனர். மேலும் விசாரணையில், கடந்த ஜனவரி மாதம் அரோரா, அவர்கள் வீட்டுக்குச் சென்று, சாப்பிட மீன் குழம்பு வாங்கி வந்ததும் தெரிய வந்தது.

தீவிர விசாரணையின் பலனாக அரோரா தான் செய்த குற்றத்தை ஒப்புக் கொண்டார். அப்போது, தான் தாலியம் கலந்த உணவை மனைவி திவ்யா, மாமியார் அனிதா, மாமனார் தேவேந்தர் மோகன், மனைவியின் தங்கை பிரியங்கா ஆகியோருக்கு கலந்து கொடுத்துள்ளதும், தொடர்ந்து அவர்கள் தன்னை மனிதாபிமானம் இல்லாமல் நடத்தியதால் இவ்வாறு செய்ததாகவும் குறிப்பிட்டுள்ளார்.

அரோராவின் செல்லிடப்பேசியில், தாலியத்தைப் பற்றி தேடியிருப்பதையும் காவல்துறையினர் கண்டறிந்துள்ளனர்.