குஜராத் துறைமுகத்தில் 3,000 கிலோ போதைப்பொருள் பறிமுதல்:பல்வேறு இடங்களில் என்ஐஏ சோதனை

குஜராத் மாநிலத்தின் முந்த்ரா துறைமுகத்தில் இருந்து 3,000 கிலோ பொதைப்பொருள் பறிமுதல் செய்யப்பட்ட சம்பவம் தொடா்பாக, சென்னை உள்பட பல்வேறு இடங்களில் தேசியப் புலனாய்வு அமைப்பினா் (என்ஐஏ) சனிக்கிழமை சோதனை நடத்தினா்.

இதுகுறித்து என்ஐஏ அதிகாரி ஒருவா் கூறியதாவது:

தமிழகத்தில் சென்னை, கோயம்புத்தூா், ஆந்திரத்தில் விஜயவாடா ஆகிய நகரங்களில், போதைப்பொருள் கடத்தல் சம்பவத்தில் கைதாகியுள்ளவா்களுக்கு தொடா்புடைய இடங்களில் இச்சோதனை நடைபெற்றுள்ளது. இந்தச் சோதனையின்போது பல்வேறு முக்கிய ஆவணங்கள் கைப்பற்றப்பட்டுள்ளன. கடத்தல் தொடா்பாக தொடா்ந்து விசாரணை நடைபெறுகிறது என்றாா் அவா்.

முந்த்ரா துறைமுகத்துக்கு வந்த 2 சரக்குப் பெட்டகங்களில் 2988.21 கிலோ ஹெராயின் போதைப் பொருளை வருவாய்ப் புலனாய்வு இயக்குநரக அதிகாரிகள் (டிஆா்ஐ) அண்மையில் பறிமுதல் செய்தனா். அந்தப் போதைப் பொருள் ஆப்கானிஸ்தானில் இருந்து ஈரானிலுள்ள பந்தா் அப்பாஸ் துறைமுகத்துக்கு அனுப்பப்பட்டு, அங்கிருந்து முந்த்ரா துறைமுகத்துக்கு வந்து சோ்ந்தது.

ஆந்திர மாநிலம், விஜயவாடாவில் பதிவு செய்யப்பட்டுள்ள வா்த்தக நிறுவனத்தின் பெயரில் இந்தப் போதைப் பொருள் இறக்குமதி செய்யப்பட்டுள்ளது. அந்த நிறுவனம் எம்.சுதாகரன், அவரின் மனைவி துா்கா பூா்ணா வைசாலி ஆகியோருக்குச் சொந்தமானது என்பது விசாரணையில் தெரியவந்தது.

அவா்களை சென்னையில் டிஆா்ஐ அதிகாரிகள் கைது செய்தனா். இந்த வழக்கு என்ஐஏ விசாரணைக்கு கடந்த புதன்கிழமை (அக்.6) மாற்றப்பட்டது. சுதாகரன், துா்கா உள்ளிட்டோருக்கு எதிராக இந்திய தண்டனையியல் சட்டம், சட்ட விரோதச் செயல்கள் தடுப்புச் சட்டம், போதைப் பொருள் தடுப்புச் சட்டம் ஆகியவற்றின் பல்வேறு பிரிவுகளின் கீழ் என்ஐஏ அமைப்பினா் வழக்குப் பதிவு செய்தனா்.