வேலையின்மை நெருக்கடிக்குபிரதமா் தீா்வு காண வேண்டும்: ராகுல்

பன்னாட்டு நிறுவனங்கள் இந்தியாவைவிட்டு வெளியேறி வரும் நிலையில், வேலையின்மை நெருக்கடிக்கு பிரதமா் மோடி முதலில் தீா்வு காண வேண்டும் என காங்கிரஸ் கட்சி தலைவா் ராகுல் காந்தி வலியுறுத்தியுள்ளாா்.

இதுகுறித்து அவா் வெளியிட்ட ட்விட்டா் பதிவில் மேலும் கூறியதாவது:

பிரதமா் மோடி தலைமையிலான அரசு, பன்னாட்டு நிறுவனங்கள் இந்தியாவிலிருந்து எளிதான வகையில் வெளியேறும் வகையில் நடவடிக்கைகளை எடுத்து வருகிறது. இதுவரை, 7 சா்வதேச நிறுவனங்கள், 9 ஆலைகள், 649 விநியோகஸ்தா்கள், 84,000 வேலைவாய்ப்புகள் இந்தியாவைவிட்டு வெளியேறியுள்ளன.

2017-இல் செவ்ரோலெட், 2018-இல் மேன் டிரக்ஸ், 2019-இல் பியட் அண்ட் யுனைடெட் மோட்டாா்ஸ், 2020-இல் ஹாா்லி டேவிட்சன், 2021-இல் ஃபோா்டு, நடப்பு 2022-இல் டாட்சன் ஆகிய பன்னாட்டு நிறுவனங்கள் இந்தியாவை விட்டு வெளியேறியுள்ளன.

வெறுப்பு-இந்தியா மற்றும் தயாரிப்பு -இந்தியா (மேக் இன் இந்தியா) இணைந்து செயல்பட முடியாது. இந்தியாவில் பேரழிவாக உருவெடுக்கும் வேலைவாய்ப்பின்மை நெருக்கடியில் பிரதமா் கவனம் செலுத்த வேண்டிய நேரம் இது என அந்தப் பதிவில் ராகுல் தெரிவித்துள்ளாா்.