6 ஆண்டுகளில் பிரதமர் மோடியின் பயணச் செலவு ரூ. 550 கோடியா?

பிரதமர் நரேந்திர மோடி இந்தாண்டில் இதுவரையில் மேற்கொண்டுள்ள வெளிநாட்டுப் பயணங்களின் செலவுகள் ரூ. 74.5 கோடி என மத்திய அரசு தெரிவித்துள்ளது.

பிரதமர் மோடியின் இதுவரையில் வெளிநாட்டு பயணங்களுக்கான செலவினம் குறித்து மாநிலங்களவையில் வெளியுறவுத் துறை இணையமைச்சர் பவித்ரா மார்கெரிதா எழுத்துபூர்வமாக பதிலளித்தார்.

மாநிலங்களவையில் அவர் தெரிவித்ததாவது, "2026 ஆம் ஆண்டில் பிரதமர் மோடி இதுவரையில் மேற்கொண்டுள்ள வெளிநாட்டு பயணங்களின் செலவு ரூ. 74.58 கோடி. இந்தாண்டு பிரதமர் மோடி சுற்றுப்பயணம் மேற்கொண்ட 5 நாடுகளில் நார்வே பயணத்துக்குத்தான் அதிகபட்சமாக ரூ. 17.46 கோடி செலவிடப்பட்டுள்ளது. இதற்கு அடுத்ததாக இஸ்ரேலுக்கு ரூ. 11.92 கோடியும், சீஷெல்ஸுக்கு ரூ. 8.22 கோடியும் செலவிடப்பட்டுள்ளது.

மேலும், 2025-ல் பிரதமர் வெளிநாட்டு சுற்றுப்பயணங்களுக்காக ரூ. 180 கோடிக்கு அதிகமாகவும், 2024-ல் ரூ. 109 கோடியும், 2023-ல் ரூ. 93 கோடியும், 2022-ல் ரூ. 55 கோடியும், 2021-ல் ரூ. 36 கோடியும் செலவிடப்பட்டுள்ளது. 2021 முதல் இன்றுவரையில் பிரதமர் மோடியின் வெளிநாட்டு பயணங்களுக்காக ரூ. 550 கோடி செலவிடப்பட்டுள்ளது.

அதே சமயம், ஜூலை 2021 முதல் பிரதமர் மோடியின் வெளிநாட்டு பயணங்களின்போது, பாதுகாப்பு, வர்த்தகம் மற்றும் முதலீடு, டிஜிட்டல் தொழில்நுட்பம், செயற்கை நுண்ணறிவு, குறைகடத்திகள், புதுப்பிக்கத்தக்க ஆற்றல், சுகாதாரம், கல்வி, விவசாயம், விண்வெளி ஒத்துழைப்பு, காலநிலை நடவடிக்கை ஆகியவற்றை உள்ளடக்கிய துறைகளில் 316 புரிந்துணர்வு ஒப்பந்தங்களும் மற்றும் உடன்படிக்கைகளும் கையெழுத்திடப்பட்டுள்ளன.

ஏப்ரல் 2021 முதல் டிசம்பர் 2025 வரையிலான காலகட்டத்தில் 381.8 பில்லியன் டாலர் அளவில் மொத்த அந்நிய நேரடி முதலீடுகள் பெறப்பட்டுள்ளன" என்று கூறியுள்ளார்.