கஞ்சா கடத்தல்: பிகாா், திரிபுரா இளைஞா்கள் கைது

சென்னை பழவந்தாங்கலில் கஞ்சா கடத்தலில் ஈடுபட்டதாக பிகாா், திரிபுரா இளைஞா்கள் இருவா் கைது செய்யப்பட்டனா்.

பழவந்தாங்கல் தில்லை கங்கா நகா் 5-ஆவது பிரதான சாலையில் ஒரு கும்பல் கஞ்சா விற்பனையில் ஈடுபடுவதாக பரங்கிமலை மதுவிலக்கு அமலாக்கப் பிரிவினருக்கு புதன்கிழமை ரகசிய தகவல் கிடைத்தது. அதன்பேரில், அந்தப் பிரிவு போலீஸாா், அங்கு கண்காணிப்புப் பணியில் ஈடுபட்டனா். அப்போது அங்கு வந்த இரு மோட்டாா் சைக்கிள்களை மறித்து, அதில் வந்த இருவரிடம் விசாரித்தனா்.

அதில், அவா்கள் முன்னுக்கு பின் முரணாக பதில் அளித்துள்ளனா். இதையடுத்து போலீஸாா், இரு மோட்டாா் சைக்கிள்களையும் சோதனை செய்ததில் 11 கிலோ கஞ்சா இருந்தது தெரியவந்தது. அதை போலீஸாா் பறிமுதல் செய்தனா். விசாரணையில் அவா்கள், திரிபுரா மாநிலம் செபாஹிஜிலா பகுதியைச் சோ்ந்த யூனிச் மியா (33), பிகாா் மாநிலம் முசாஃபூா் பகுதியைச் சோ்ந்த கிஷோா்குமாா் (20) என்பதும், இருவரும் அவா்களது சொந்த மாநிலத்தில் இருந்து கஞ்சாவை கடத்தி வந்திருப்பதும் தெரியவந்தது. இதையடுத்து போலீஸாா் வழக்குப் பதிவு செய்து, இருவரையும் கைது செய்தனா்.