ஜூலை 5-ல் நடராஜர் கோயில் ஆனித்திருமஞ்சன தரிசன உற்சவம் தொடக்கம்

பூலோக கையாலயம் என்றழைக்கப்படும் சிதம்பரம் ஸ்ரீநடராஜர் கோயில் ஸ்ரீசிவகாமசுந்தரி சமேத ஸ்ரீமந் நடராஜமூர்த்தியின் ஆனித்திருமஞ்சன தரிசன உற்சவம் வருகிற ஜூலை 5-ம் தேதி கொடியேற்றத்துடன் தொடங்கி 10 நாட்கள் நடைபெறுகிறது.

உற்சவ விபரம்: 6-ம் தேதி வெள்ளி சந்திர பிரபை வாகன வீதிஉலா, 7-ம் தேதி தங்க சூரிய பிரபை வாகன வீதிஉலா, 8-ம் தேதி வெள்ளி பூதவாகன வீதிஉலா, 9-ம் தேதி வெள்ளி ரிஷப வாகன (தெருவடைச்சான்) வீதி உலா, 10-ம் தேதி வெள்ளி யானை வாகன வீதிஉலா, 11-ம் தேதி தங்க கைலாச வாகன வீதிஉலா, 12-ம் தேதி தங்க ரதத்தில் பிச்சாண்டவர் வெட்டுங்குதிரையில் வீதிஉலா காட்சி நடைபெறுகிறது.

13-ம் தேதி சனிக்கிழமை தேர்த்திருவிழா, சித்சபையில் உள்ள ஸ்ரீசிவகாமசுந்தரி சமேத ஸ்ரீமந்நடராஜமூர்த்தி அதிகாலை 5 மணி முதல் 5.30 மணிக்குள் திருத்தேரில் எழுந்தருளுதல், தேர் விதிஉலா வந்த பின்னர் இரவு 8 மணிக்கு ஆயிரங்கால் மண்டபத்தில் ஏககால லட்சார்ச்சனை நடைபெறுகிறது. 14-ம் தேதி ஞாயிற்றுக்கிழமை அதிகாலை சூரிய உதயத்திற்கு முன் ஆயிரங்கால் மண்டப முகப்பில் மகாபிஷேகமும், திருவாபரண அலங்கார காட்சியும், பிற்பகல் 1 மணிக்கு மேல் பஞ்சமூர்த்தி வீதிஉலா வந்த பின்னர் ஆனித்திருமஞ்சன தரிசனமும் நடைபெறுகிறது. ஜூலை 15-ம் தேதி முத்துப்பல்லக்கு வீதிஉலா காட்சியுடன் உற்சவம் முடிவடைகிறது. உற்சவ ஏற்பாடுகளை உற்சவ ஆச்சாரியார் எஸ்.டி.கோவிந்தராஜ தீட்சிதர், பொதுதீட்சிதர்களின் செயலாளர் எம்.காசிராஜ தீட்சிதர், துணைச்செயலாளர் எஸ்.டி.ருத்ரகணேஷ் தீட்சிதர் ஆகியோர் செய்து வருகின்றனர்.