சிதம்பரம் அருகே கட்டுமானப் பணியின் போது கீழே விழுந்து தொழிலாளர் சாவு

சிதம்பரம் அருகே தனியார் மின்உற்பத்தி நிறுவனத்தில் கட்டுமானப்பணியில் ஈடுபட்டிருந்த பீகார் மாநிலத்தைச் சேர்ந்த தொழிலாளி ஒருவர் 20 அடி உயரத்திலிருந்து கீழே விழுந்து மரணமடைந்தார்.

பீகார் மாநிலம் உத்தமயாதவ் (22). இவர் சிதம்பரம் அருகே கரிக்குப்பத்தில் அமைக்கப்பட்டு வரும் ஐஎல்எஃப்எஸ் மின் உற்பத்தி நிறுவனத்தில் கட்டுமானப்பணி செய்து வருகிறார். இந்நிலையில் ஞாயிற்றுக்கிழமை காலை கட்டுமானப்பணியில் ஈடுபட்டிருந்த போது கட்டடத்தின் 20 அடி உயரத்திலிருந்து கீழே விழுந்து காயமுற்றார். உடனடியாக அவர் சிதம்பரம் அண்ணாமலைப் பல்கலைக்கழக ராஜா முத்தையா மருத்துவக்கல்லூரி மருத்துவமனையில் சிகிச்சைக்கு சேர்க்கப்பட்டார். அங்கு தீவிர சிகிச்சை அளித்தும் பலனளிக்காமல் உத்தமயாதவ் இறந்தார். இதுகுறித்து பரங்கிப்பேட்டை போலீஸார் வழக்குப் பதிவு செய்து விசாரணை நடத்தி வருகின்றனர்.

ரூ.15 லட்சம் நஷ்ட ஈடு வழங்க கோரிக்கை: விபத்து குறித்து பரங்கிப்பேட்டை ஒன்றிய மார்க்சிஸ்ட் கம்யூ கட்சி செயலாளர் எஸ்.ஜி.ரமேஷ்பாபு தெரிவித்தது:- ஐஎல்எஃப்எஸ் தனியார் மின்உற்பத்தி நிறுவனத்திற்கு, புதுதில்லியில் உள்ள தேசிய பசுமை தீர்ப்பாயம் தடை விதித்துள்ளது. அதனையும் மீறி தொடர்ந்து கட்டுமானப்பணி நடைபெற்று வருகிறது. சமீபத்தில் மாவட்ட ஆட்சியர் உள்ளிட்ட அதிகாரிகள் சந்தித்து கட்டுமானப் பணிகளை தடுத்து நிறுத்த வேண்டும் என தெரிவித்தோம். ஆனால் இந்நிலையில் தொடர்ந்து கட்டுமானப்பணிகள் நடைபெற்று வருவதால், கட்டுமானப்பணியில் ஈடுபட்டிருந்த பீகார் மாநிலத்தைச் சேர்ந்த தொழிலாளி கீழே விழுந்து இறந்துள்ளார். எனவே அவரது குடும்பத்திற்கு ரூ.15 லட்சம் இழப்பீடு வழங்க வேண்டும். கட்டுமானப்பணிகளை மாவட்ட நிர்வாகம் தடுத்து நிறுத்த வேண்டும் என எஸ்.ஜி.ரமேஷ்பாபு தெரிவித்துள்ளார்.