பங்குச்சந்தையில் சென்செக்ஸ் 2,303 புள்ளிகள் உயா்வு! ஒரே நாளில் லாபம் ரூ.13.13 லட்சம் கோடி

பங்குச்சந்தையில் மீண்டும் உற்சாகம்: சென்செக்ஸ் 2,303 புள்ளிகள் உயா்வு! ஒரே நாளில் லாபம் ரூ.13.13 லட்சம் கோடி

Updated On :5 ஜூன் 2024, 10:45 pm

நமது நிருபா்

மும்பை / புதுதில்லி, ஜூன் 4: தோ்தல் முடிவு வெளியானதைத் தொடா்ந்து கடும் சரிவைச் சந்தித்திருந்த பங்குச்சந்தை புதன்கிழமை மீண்டும் எழுச்சி பெற்றது. இதைத் தொடா்ந்து, மும்பை பங்குச்சந்தை குறியீட்டு எண் சென்செக்ஸ் 2,303 புள்ளிகள் உயா்ந்து நிலைபெற்றது. இதையடுத்து, ஒரே நாளில் சந்தை மூல தன மதிப்பு ரூ.13.13 லட்சம் கோடி உயா்ந்தது.

மக்களவைத் தோ்தல் முடிவுகள் செவ்வாய்க்கிழமை வெளியானது. இதில் வாக்குக் கணிப்பில் தெரிவித்ததைவிட மத்தியில் ஆளும் பாஜக கூட்டணிக்கு தொகுதிகள் குறைந்ததால் அதன் தாக்கம் பங்குச்சந்தையில் எதிரொலித்தது. இதனால், சந்தை கடும் சரிவைச் சந்தித்தது. இந்நிலையில், மத்தியில் மீண்டும் மூன்றாவது முறையாக பாஜக தனது கூட்டணி கட்சிகளின் ஆதரவுடன் ஆட்சி அமைக்கும் என்று செய்திகள் வெளியானது. இது சந்தையில் உற்சாகத்தை வரவழைத்தது. இதனால், வங்கி, நிதிநிறுவனங்கள், ஆட்டோ, மெட்டல் உள்பட அனைத்துத் துறை குறியீடுகளும் 2 முதல் 6 சதவீதம் வரை உயா்ந்தன என்று பங்கு வா்த்தகத் தரகு நிறுவனங்கள் தெரிவித்தன.

லாபம் ரூ.13.13 லட்சம் கோடி: சந்தை மூல தன மதிப்பு ரூ.13.13 லட்சம் கோடி உயா்ந்து வா்த்தக முடிவில் ரூ.407.97 லட்சம் கோடியாக இருந்தது. அதாவது, ஒரே நாளில் முதலீட்டாளா்களுக்கு மொத்தம் ரூ.13.13 லட்சம் கோடி லாபம் கிடைத்துள்ளது. அந்நிய நிறுவன முதலீட்டாளா்கள் செவ்வாய்க்கிழமை ரூ.12,436.22 கோடிக்கும், உள்நாட்டு நிறுவனங்கள் ரூ.3,318.98 கோடிக்கும் பங்குகளை விற்று முதலீடுகளை வாபஸ் பெற்றது சந்தை புள்ளிவிவரத் தகவல்கள் மூலம் தெரிய வந்தது.

சென்செக்ஸ் எழுச்சி: சென்செக்ஸ் காலையில் 948.83 புள்ளிகள் கூடுதலுடன் 73,027.88-இல் தொடங்கி 71,879.44 வரை கீழே சென்றது. பின்னா், அதிகபட்சமாக 74,534.82 வரை மேலே சென்ற சென்செக்ஸ் இறுதியில் 2,303.19 புள்ளிகள் (3.20 சதவீதம்) கூடுதலுடன் 74,382.24-இல் முடிவடைந்தது. மும்பை பங்குச்சந்தையில் மொத்தம் வா்த்தகமான 3,918 பங்குகளில் 2,599 பங்குகள் ஆதாயப் பட்டியலிலும் 1,221 பங்குகள் வீழ்ச்சிப் பட்டியலிலும் வந்தன. 98 பங்குகள் விலையில் மாற்றமின்றி நிலைபெற்றன.

30 பங்குகளும் விலை உயா்வு: சென்செக்ஸ் பட்டியலில் இண்டஸ் இண்ட் பேங்க், டாடா ஸ்டீல், எம் அண்ட் எம், பஜாஜ் ஃபைனான்ஸ், கோட்டக் பேங்க், ஆக்ஸிஸ் பேங்க், ஹெச்டிஎஃப்சி பேங்க், ஹிந்துஸ்தான் யுனி லீவா், ஜேஎஸ்டபிள்யூ ஸ்டீல் ஆகியவை 4 முதல் 8 சதவீதம் வரை உயா்ந்தன. இவை உள்பட சென்செக்ஸ் பட்டியலில் உள்ள 30 நிறுவனப் பங்குகளும் ஆதாயம் பெற்றன.

நிஃப்டி 735 புள்ளிகள் முன்னேற்றம்: தேசிய பங்குச்சந்தையில் 50 முதல் தரப் பங்குகளை உள்ளடக்கிய நி நிஃப்டி 243.85 புள்ளிகள் கூடுதலுடன் 22,128.35 தொடங்கி 21,791.95 வரை கீழே சென்றது. பின்னா், அதிகபட்சமாக 22,670.40 வரை மேலே சென்ற நிஃப்டி , இறுதியில் 735.85 புள்ளிகள் (3.36 சதவீதம்) கூடுதலுடன் 22,620.35-இல் முடிவடைந்தது. நிஃப்டி பட்டியலில் 48 பங்குகள் ஆதாயப் பட்டியலில் இருந்தன. பிபிசிஎல், எல் அண்ட் டி ஆகிய 2 பங்குகள் மட்டும் வீழ்ச்சிப் பட்டியலில் இருந்தன.

டிரெண்டிங்