அமெரிக்காவில் கிரிக்கெட்: பாகிஸ்தான் - மேற்கிந்தியத்தீவுகள் பங்கேற்பு

பாகிஸ்தான் - மேற்கிந்தியத்தீவுகள் பங்கேற்கும் இரு 20 ஓவர் கிரிக்கெட் போட்டியை அமெரிக்காவில் நடத்த இருநாட்டு கிரிக்கெட் வாரியங்களும் ஒப்புக் கொண்டுள்ளன.

அமெரிக்காவில் கிரிக்கெட்டை பிரபலப்படுத்தும் நோக்கில் இந்த முயற்சி மேற்கொள்ளப்பட்டுள்ளது. ஜூலை மாதத்தில் மியாமி, ஃபுளோரிடாவில் இப்போட்டி நடைபெறவுள்ளது.

இலங்கை, நியூஸிலாந்து, மேற்கிந்தியத்தீவுகள் ஆகிய நாடுகள் ஏற்கெனவே மியாமி, ஃபுளோரிடாவில் கிரிக்கெட் போட்டியில் பங்கேற்றுள்ளன. ஆனால் அங்கு ஆடுகளம் சரியில்லாததால் போட்டிகளை சிறப்பாக நடைபெறவில்லை.

பாகிஸ்தான் அணி ஜூலை 7-ம் தேதி மேற்கிந்தியத்தீவுகளுக்குச் செல்கிறது. அங்கு 5 ஒருநாள் போட்டிகளில் விளையாடுகிறது. அதைத் தொடர்ந்து இரு அணிகளும் அமெரிக்கா செல்கின்றன.