3-வது டி20: பிளேயிங் லெவனில் முகமது ஷமி இடம்பெறுவாரா?

இந்தியா மற்றும் இங்கிலாந்து அணிகளுக்கு இடையிலான 3-வது டி20 போட்டிக்கான இந்திய அணியின் பிளேயிங் லெவனில் முகமது ஷமி இடம்பெறுவாரா என்ற எதிர்பார்ப்பு ரசிகர்கள் மத்தியில் எழுந்துள்ளது.

இந்தியா மற்றும் இங்கிலாந்து அணிகளுக்கு இடையிலான டி20 தொடர் தற்போது நடைபெற்று வருகிறது. முதல் போட்டி கொல்கத்தாவின் ஈடன் கார்டன்ஸ் மைதானத்திலும், இரண்டாவது போட்டி சென்னை சேப்பாக்கம் மைதானத்திலும் நடைபெற்றது. இந்த இரண்டு போட்டிகளிலும் வெற்றி பெற்ற இந்திய அணி, 5 போட்டிகள் கொண்ட டி20 தொடரில் 2-0 என்ற கணக்கில் முன்னிலையில் உள்ளது.

இதையும் படிக்க: வாழ்வா? சாவா? போட்டிக்கான மும்பை அணி அறிவிப்பு; ரோஹித் சர்மா அணியில் இல்லை!

பிளேயிங் லெவனில் முகமது ஷமி இடம்பெறுவாரா?

இந்தியா - இங்கிலாந்து அணிகளுக்கு இடையிலான மூன்றாவது டி20 போட்டி இன்று நடைபெறவுள்ள நிலையில், வேகப் பந்துவீச்சாளர் முகமது ஷமி பிளேயிங் லெவனில் இடம்பெறுவாரா என்ற எதிர்பார்ப்பு ரசிகர்கள் மத்தியில் அதிகரித்துள்ளது.

கடந்த 2023 ஆம் ஆண்டு உலகக் கோப்பைத் தொடரின்போது, முகமது ஷமிக்கு காயம் ஏற்பட்டது. அதன் பின், அவர் இந்திய அணிக்காக விளையாடவில்லை. 14 மாதங்களுக்குப் பிறகு இங்கிலாந்து தொடரின் மூலம் முகமது ஷமி இந்திய அணிக்குத் திரும்பினார். இருப்பினும், முதல் இரண்டு போட்டிகளில் அவர் பிளேயிங் லெவனில் இடம்பெறவில்லை.

இதையும் படிக்க: சதம் விளாசி வரலாறு படைத்த கொங்கடி த்ரிஷா; இந்தியா அபார வெற்றி!

இந்திய அணி வீரர்களுடன் இணைந்து பந்துவீச்சு பயிற்சியில் ஈடுபடும் முகமது ஷமி, போட்டிகளில் களமிறக்கப்படாதது ரசிகர்களுக்கு ஏமாற்றத்தை அளித்தது. சாம்பியன்ஸ் டிராபி தொடரை மனதில் வைத்து முகமது ஷமியை, இந்திய அணி நிர்வாகம் களமிறக்கவில்லையா என்ற கேள்வியும் எழுந்தது.

5 போட்டிகள் கொண்ட டி20 தொடரில் இந்திய அணி 2-0 என முன்னிலையில் உள்ளது. தொடரை வெல்வதற்கான முக்கியமான போட்டி என்பதால், இன்றையப் போட்டியில் முகமது ஷமி பிளேயிங் லெவனில் இடம்பெறலாம் என எதிர்பார்க்கப்படுகிறது.

இந்திய அணி நிர்வாகம் முகமது ஷமியை பிளேயிங் லெவனில் களமிறக்குமா என்பதை பொறுத்திருந்து பார்க்கலாம்.