ஐபிஎல் போட்டியில் முதல்முறையாக ஒரு பருவத்தில் 9 தோல்விகளைச் சந்தித்துள்ளது மும்பை இந்தியன்ஸ் அணி.
நவி மும்பையில் நடைபெற்ற மும்பைக்கு எதிரான ஆட்டத்தில் கொல்கத்தா அணி 52 ரன்கள் வித்தியாசத்தில் வென்றது. முதலில் பேட்டிங் செய்த கொல்கத்தா அணி, 20 ஓவர்களில் 9 விக்கெட் இழப்புக்கு 165 ரன்கள் எடுத்தது. வெங்கடேஷ் ஐயர், நிதிஷ் ராணா தலா 43 ரன்கள் எடுத்தார்கள். பும்ரா 4 ஓவர்களில் 10 ரன்கள் கொடுத்து 5 விக்கெட்டுகளை எடுத்தார். மும்பை அணி, 17.3 ஓவர்களில் 113 ரன்களுக்கு ஆட்டமிழந்தது. இஷான் கிஷன் 51 ரன்கள் எடுத்தார். கம்மின்ஸ் 3 விக்கெட்டுகளை வீழ்த்தினார். ஆட்ட நாயகனாக பும்ரா தேர்வானார்.
இந்த வருட ஐபிஎல் போட்டியில் இதுவரை 11 ஆட்டங்களில் விளையாடி 2 வெற்றிகளை மட்டுமே பெற்றுள்ளது மும்பை அணி. 9 தோல்விகள்.
இதுவரை எந்தவொரு ஐபிஎல் போட்டியிலும் மும்பை அணி 9 தோல்விகளைக் கண்டதில்லை. 2018, 2014, 2009 ஆகிய ஆண்டுகளில் தலா 8 ஆட்டங்களில் தோற்றுள்ளது. இந்தமுறைதான் முதல்முறையாக 9 தோல்விகள். இதனால் ஐபிஎல் 2022 போட்டி மிக மோசமான அனுபவமாக மும்பைக்கு அமைந்துவிட்டது.
அடுத்த வருடம் ஜோஃப்ரா ஆர்ச்சர் மும்பை அணியில் விளையாடவுள்ளதால் நிலைமை மாறும் என எதிர்பார்க்கலாம்.