லக்னௌ அணிக்கு 236 ரன்கள் இலக்கு நிர்ணயித்த கேகேஆர்!

லக்னௌ சூப்பர் ஜெயண்ட்ஸ் அணிக்கு எதிராக முதலில் பேட் செய்த கொல்கத்தா நைட் ரைடர்ஸ் 6 விக்கெட்டுகளை இழந்து 235 ரன்கள் எடுத்துள்ளது.

ஐபிஎல் தொடரில் லக்னௌவில் நடைபெற்று வரும் இன்றையப் போட்டியில் லக்னௌ சூப்பர் ஜெயண்ட்ஸ் மற்றும் கொல்கத்தா நைட் ரைடர்ஸ் அணிகள் விளையாடி வருகின்றன. இந்தப் போட்டியில் டாஸ் வென்ற லக்னௌ சூப்பர் ஜெயண்ட்ஸ் பந்துவீச்சைத் தேர்வு செய்ய, கொல்கத்தா நைட் ரைடர்ஸ் முதலில் பேட் செய்தது.

அந்த அணியில் தொடக்க ஆட்டக்காரர்களாக பில் சால்ட் மற்றும் சுனில் நரைன் களமிறங்கினர். இந்த இணை அதிரடியாக விளையாடி ரன்களை சேர்த்தது. இருப்பினும், பில் சால்ட் 14 பந்துகளில் 32 ரன்கள் எடுத்து ஆட்டமிழந்தார். அதில் 5 பவுண்டரிகள் மற்றும் ஒரு சிக்ஸர் அடங்கும். இதனையடுத்து, களமிறங்கிய ரகுவன்ஷி நிதான ஆட்டத்தை வெளிப்படுத்தினார். தொடக்கம் முதலே அதிரடியான ஆட்டத்தை வெளிப்படுத்திய சுனில் நரைன், பவுண்டரிகள் மற்றும் சிக்ஸர்களை பறக்கவிட்டு அசத்தினார். ரகுவன்ஷி 32 ரன்களில் ஆட்டமிழந்தார்.

தொடக்கம் முதலே அதிரடியான ஆட்டத்தை வெளிப்படுத்தி லக்னௌ பந்துவீச்சாளர்களை திணறடித்த சுனில் நரைன் 39 பந்துகளில் 81 ரன்கள் எடுத்து ஆட்டமிழந்தார். அதில் 6 பவுண்டரிகள் மற்றும் 7 சிக்ஸர்கள் அடங்கும். அதன்பின் களமிறங்கிய ஆண்ட்ரே ரஸல் (12 ரன்கள்), ரிங்கு சிங் (16 ரன்கள்) மற்றும் ஸ்ரேயாஸ் ஐயர் (23 ரன்கள்) எடுத்து ஆட்டமிழந்தனர். இறுதிக்கட்டத்தில் அதிரடியாக விளையாடிய ரமன்தீப் சிங் 6 பந்துகளில் 25 ரன்கள் எடுத்தார். அதில் ஒரு பவுண்டரி மற்றும் 3 சிக்ஸர்கள் அடங்கும்.

இறுதியில் நிர்ணயிக்கப்பட்ட 20 ஓவர்களின் முடிவில் கொல்கத்தா நைட் ரைடர்ஸ் 6 விக்கெட்டுகளை இழந்து 235 ரன்கள் எடுத்துள்ளது. லக்னௌ தரப்பில் நவீன் உல் ஹக் 3 விக்கெட்டுகளைக் கைப்பற்றி அசத்தினார். யஷ் தாக்குர், ரவி பிஷ்னோய் மற்றும் யுத்விர் சிங் தலா ஒரு விக்கெட்டினைக் கைப்பற்றினர்.

236 ரன்கள் எடுத்தால் வெற்றி என்ற இலக்கை நோக்கி லக்னௌ சூப்பர் ஜெயண்ட்ஸ் விளையாடி வருகிறது.