ஆஷஸ் தொடருக்கான இங்கிலாந்து அணி அறிவிப்பு! அணியில் இடம்பிடித்த ஸ்டோக்ஸ்!

ஆஸ்திரேலியா - இங்கிலாந்து அணிகளுக்கு இடையேயான ஆஷஸ் தொடருக்கான இங்கிலாந்து அணி அறிவிக்கப்பட்டுள்ளது.

கிரெய்க் ஓவர்டன், பென் ஃபோக்ஸ், மேசன் கிரேன் ஆகிய மூன்று புதுமுகங்கள் இங்கிலாந்து அணியில் இடம்பிடித்துள்ளார்கள். 

5 டெஸ்ட் போட்டிகள் கொண்ட ஆஷஸ் தொடர், நவம்பர் 23 அன்று பிரிஸ்பேனில் தொடங்குகிறது. ஜனவரி 8 அன்று சிட்னியில் நிறைவுபெறுகிறது. 

இதுவரை நடைபெற்ற 69 ஆஷஸ் தொடர்களில் ஆஸ்திரேலியா, இங்கிலாந்து ஆகிய இரு அணிகளும் தலா 32 முறை வெற்றி பெற்றுள்ளன. மீதமுள்ள 5 டெஸ்ட் போட்டிகள் டிராவில் முடிவடைந்துள்ளன. ஆகஸ்ட் 2015 வரை நடைபெற்ற ஆஷஸ் டெஸ்ட் போட்டிகளில் ஆஸ்திரேலியா 130 டெஸ்டுகளையும் இங்கிலாந்து 106 டெஸ்டுகளையும் வெற்றி பெற்றுள்ளன. 89 டெஸ்டுகள் டிராவில் முடிவடைந்துள்ளன. 2015-ல் கடைசியாக நடைபெற்ற ஆஷஸ் தொடரை 3-2 என்கிற கணக்கில் இங்கிலாந்து வெற்றி பெற்றது. 

இங்கிலாந்து கிரிக்கெட் வீரர் பென் ஸ்டோக்ஸ், பிரிஸ்டோலில் உள்ள இரவு நேர கேளிக்கை விடுதியில் தகராறில் ஈடுபட்டது தொடர்பாக கைதாகி விடுதலையானார். அவரும் அணியில் இடம்பிடித்துள்ளார்.

இங்கிலாந்து அணி: ஜோ ரூட் (கேப்டன்), மொயின் அலி, ஜேம்ஸ் ஆண்டர்சன், ஜானி பெர்ஸ்டோவ், ஜேக் பால், கேரி பேலன்ஸ், ஸ்டூவர்ட் பிராட், அலாஸ்டர் குக், மேசன் கிரேன், பென் ஃபோக்ஸ், டேவிட் மாலன், கிரெய்க் ஓவர்டன், பென் ஸ்டோக்ஸ், மார்க் ஸ்டோன்மேன், ஜேம்ஸ் வின்ஸ், கிறிஸ் வோக்ஸ்.