ஆசியப் போட்டிக்கான இந்திய ஆடவர் ஹாக்கி அணி அறிவிப்பு

ஜாகர்த்தாவில் நடக்கவுள்ள ஆசிய விளையாட்டுப் போட்டிக்கான இந்திய ஆடவர் ஹாக்கி அணி அறிவிக்கப்பட்டுள்ளது.
அண்மையில் நடைபெற்ற சாம்பியன்ஸ் கோப்பை ஹாக்கி போட்டியில் வெள்ளிப் பதக்கம் வென்ற நிலையில் இந்திய அணி அடுத்து ஆகஸ்டில் ஆசியப் போட்டியில் பங்கேற்கிறது. 
கோல்கீப்பர் பிஆர்.ஸ்ரீஜேஷ் தலைமையிலான 18 பேர் கொண்ட அணியில் பெனால்டி கார்னர் நிபுணர் ரூபிந்தர் பால் சிங், முன்கள வீரர் அகஷ்தீப் சிங் ஆகியோரும் இடம் பெற்றுள்ளனர். சிங்கலெசெனா சிங் துணைக் கேப்டனாக உள்ளார். 
கடந்த 2014 இன்சியானில் நடந்த ஆசியப் போட்டியில் பாகிஸ்தானை வீழ்த்தி இந்தியா தங்கம் வென்றது. ஜாகர்த்தா ஆசியப் போட்டியில் தங்கம் வென்றால், 2020 டோக்கியோ ஒலிம்பிக் போட்டிக்கு நேரடியாக தகுதி பெறலாம். 
அணி விவரம்: பிஆர்.ஸ்ரீஜேஷ், கிருஷண் பி பதக், ஹர்மன்பிரீத் சிங், வருண்குமார், பிரேந்திர லக்ரா, சுரேந்தர் குமார், ரூபிந்தர் பால் சிங், அமித் ரோஹிதாஸ், மன்பிரீத் சிங், சிங்கலெசெனா சிங், சிம்ரஞ்சித் சிங், சர்தார் சிங், விவேக்சாகர் பிரசாத், எவி.சுனில், மந்தீப் சிங், அகஷ்தீப் சிங், லலித்குமார் உபாத்யாய், தில்பிரீத் சிங்.
இதுதொடர்பாக அணியின் பயிற்சியாளர் ஹரேந்திர சிங் கூறுகையில்: 
அணியின் கட்டமைப்பு சிறப்பாக உள்ளது. ரமண்தீப் சிங் இல்லாதது சிறிது இழப்பு தான். எனினும் ரூபிந்தர் பால், அகஷ்தீப் சிங் ஆகியோர் இணைந்துள்ளது சாதகமான அம்சம். பெங்களூருவில் தேசிய முகாம் நடைபெறும். 
தென்கொரியாவுடன், நியூஸிலாந்துடன் 5 பயிற்சி ஆட்டங்கள் நடைபெறவுள்ளன. தங்கம் வென்று ஒலிம்பிக் போட்டிக்கு நேரடித் தகுதி பெறுவதை நோக்கமாக கொண்டுள்ளோம் என்றார்.