ஸ்மித் சர்ச்சை: தொழில்நுட்பம் மீது குறை கூறும் அஸ்வின்!

தென் ஆப்பிரிக்காவுக்கு எதிராக 4 டெஸ்ட் ஆட்டங்கள் கொண்ட தொடரில் ஆஸ்திரேலியா விளையாடி வருகிறது.

கடந்த 1-ம் தேதி தொடங்கிய முதல் ஆட்டத்தில் ஆஸ்திரேலியா 118 ரன்கள் வித்தியாசத்தில் வெற்றி பெற்றது. இரண்டாவது டெஸ்ட்டில் தென் ஆப்பிரிக்கா 6 விக்கெட்டுகள் வித்தியாசத்தில் வெற்றி பெற்றது. இந்நிலையில், 3-ஆவது டெஸ்ட் ஆட்டம் கடந்த 22-ஆம் தேதி தொடங்கியது. இந்த ஆட்டத்தில் ஆஸ்திரேலிய வீரர் பேன்கிராஃப்ட் பந்தை சேதப்படுத்த முயன்றது விடியோவில் பதிவாகியது. இது ஆஸ்திரேலிய கேப்டன் ஸ்மித் உதவியுடன் செய்யப்பட்டதும் வெளிச்சத்துக்கு வந்துள்ளது. இந்தக் குற்றச்சாட்டை ஸ்மித்தும், பேன்கிராஃப்டும் ஒப்புக் கொண்டுள்ளனர். அத்துடன், அணியின் கேப்டன் பொறுப்பிலிருந்து ஸ்மித்தும், துணை கேப்டன் பொறுப்பிலிருந்து டேவிட் வார்னரும் விலகிக் கொள்வதாக அறிவித்தனர்.

ஆஸ்திரேலிய பிரதமர் மால்கம் டர்ன்புல் உள்பட அந்நாட்டில் பல்வேறு தரப்புகளிலிருந்து இவர்களின் செயலுக்கு கடும் கண்டனம் எழுந்துள்ளது. அந்நாட்டிலிருந்து வெளிவரும் பிரபல பத்திரிகைகளும் அவர்களை கடுமையாக சாடி முதல் பக்கத்தில் செய்திகளை வெளியிட்டுள்ளன. சமூக வலைதளங்களில் கிரிக்கெட் ரசிகர்களும் தங்களது கோபத்தை வெளிப்படுத்தி வருகின்றனர்.இந்நிலையில் தனியார் தொலைக்காட்சிக்குப் பிரபல கிரிக்கெட் வீரர் அஸ்வின் அளித்த பேட்டியில் கூறியதாவது:

தொழில்நுட்பம் அந்தளவுக்குச் செல்லாமல் இருந்திருந்தால் நாம் இப்போது இதைப் பற்றி பேசிக்கொண்டிருக்க மாட்டோம். பரபரப்பான கட்டத்தில் இதுபோன்ற சம்பவங்கள் நடைபெறும். வெகுதூரத்தில் இருந்துகொண்டு ஆடுகளத்தில் என்ன நடந்திருக்கும், ஓய்வறையில் என்ன நடந்திருக்கும் என்று கருத்து சொல்வது கடினமானது. 

தொழில்நுட்ப ரீதியிலான ஆதாரங்களைக் கொண்டுள்ளது. நான் அச்செயலுக்கு ஆதரவு தெரிவிக்கவில்லை. ஆனால் கிரிக்கெட், தொழில்நுட்ப ரீதியிலானது. பொதுமக்களின் கவனத்துக்கு ஆளாகும்போது மிகவும் உஷாராக இருக்க வேண்டும். கண்ணியமான முறையில் நடந்துகொள்ளவேண்டிய பொறுப்பு உள்ளது. தொழில்நுட்பம் வளர்வதில் உள்ள குறைபாடு இது. கிரிக்கெட்டையும் வாழ்க்கையையும் தொழில்நுட்பம் வழிநடத்துகிறது என்று கூறலாம் எனக் கூறியுள்ளார்.