பிஎஸ்ஜி கோப்பை: சென்னை வருமான வரித் துறை சாம்பியன்

கோவையில் நடைபெற்ற தேசிய அளவிலான கூடைப்பந்துப் போட்டியில் சென்னை வருமான வரித் துறை அணி வெற்றி பெற்று பி.எஸ்.ஜி. கோப்பையைத் தட்டிச் சென்றது.
இறுதிச் சுற்றில் சென்னை வருமான வரித் துறை, பெங்களூரு விஜயா வங்கி அணிகள் வியாழக்கிழமை மாலை விளையாடின. இதில் சென்னை வருமான வரித் துறை அணி 82-78 என்ற புள்ளிகள் கணக்கில் விஜயா வங்கி அணியை வீழ்த்தி, பி.எஸ்.ஜி. கோப்பையை வென்றது.
முன்னதாக நடைபெற்ற மூன்றாவது இடத்துக்கான ஆட்டத்தில் சென்னை இந்தியன் வங்கி அணி 82-70 என்ற புள்ளிகள் கணக்கில் இந்தியன் ரயில்வேயை தோற்கடித்தது.
முதலிடம் பிடித்த அணிக்கு கோப்பையுடன் ரூ.1 லட்சம் ரொக்கப் பரிசு வழங்கப்பட்டது. 2ஆவது இடம் பிடித்த அணிக்கு ரூ.50 ஆயிரம் பரிசு வழங்கப்பட்டது.
மேலும், சிறந்த விளையாட்டு வீரருக்கான ரூ.10 ஆயிரம் பரிசை வருமான வரித் துறை அணியின் வீரர் ஜீவா பெற்றார்.
வெற்றி பெற்றவர்களுக்கு மாநகரக் காவல் ஆணையர் கு.பெரியய்யா, தொழிலதிபர் ஜி.சீனிவாசன் ஆகியோர் பரிசுகளை வழங்கினர். பி.எஸ்.ஜி. அறக்கட்டளையின் நிர்வாக அறங்காவலர் எல்.கோபாலகிருஷ்ணன், பி.எஸ்.ஜி. விளையாட்டுக் கழகத் தலைவர் ருத்ரமூர்த்தி, செயலர் பழனிசாமி உள்ளிட்டோர் உடனிருந்தனர்.